Zyrtarë amerikane kanë finalizuar sanksione të reja ekonomike kundër Rusisë, qe përfshijnë sektorët bankarë e energjetike, në përpjekjen për të intensifikuar presionin ndaj Moskës që të pranojë planin e Trump për t’i dhënë fund luftës në Ukrainë.
Këtë e pohojnë 3 burime me dijeni mbi çështjen, për agjencinë e lajmeve Reuters. Siç thuhet, mes shënjestrave të mundshme përfshihen gjigandi rus i naftës, Gazprom dhe entitete madhore të përfshira në sektorët e resurseve natyrore dhe atë bankar. Megjithatë nuk është e qartë nëse paketa e sanksioneve do të miratohet nga Trump, i cili pas deklaratave fillestare dashamirëse ndaj Rusisë, duket i frustruar nga refuzimi qe putin po i bën planit të paqes.
Miratimi i mundshëm i sanksioneve të reja nga Trump, qe do të pasonte nënshkrimin e marrëveshjes për mineralet mes SHBA dhe Ukrainës, do të nënkuptonte një ashpërsim të qëndrimit ndaj Kremlinit. Kurt Volker, i cili ishte përfaqësues i posaçëm i Trump për negociatat me Ukrainën gjatë mandatit të tij të parë, tha se Trump i ka dhënë Putinit çdo mundësi për paqen po ai vazhdonte ta refuzonte. Faza tjetër sipas tij, do të jetë shtimi I presionit ndaj Moskës, shkruan a2cnn.Më herët Departamenti i Shtetit tha se SHBA nuk do të ndërmjetësonin më mes Rusisë dhe Ukrainës, dhe se palët duhet të gjenin vetëm mënyrat se si ti jepnin fund luftës në Ukrainë.
