Ka shkuar në 42 numri i të lënduarve nga shpërthimi i bombolës së gazit në një qendër tregtare në Ferizaj.
Komandanti i policisë në Ferizaj, Emin Beqiri ka njoftuar se 12 nga të lënduarit janë dërguar në Qendrën Klinike Universitare në Prishtinë për trajtim për shkak të lëndimeve më serioze.
“Realisht, numri i të lënduarve ka shkuar në 42, 12 prej tyre janë dërguar në Prishtinë ndërsa pjesa tjetër janë duke u trajtuar në Ferizaj nëpër klinika të ndryshme janë të shpërndarë. Për gjendjen e tyre nuk kemi ende ndonjë informacion të saktë, por informacionet e para thonë se 7-8 prej tyre e kanë të rëndë gjendjen”, tha Beqiri.
Në anën tjetër, nga QKUK për lajmi.net kanë thënë se të lënduarit nga shpërthimi në Ferizaj kanë plagë në vende të ndryshme të trupit.
