Demokratja me karrierë të gjatë në shërbim publik synon të mbrojë të drejtat zgjedhore dhe institucionet demokratike në një kohë tensionesh politike në SHBA.
Shqiptarja Suzanna Shkreli ka shpallur zyrtarisht kandidaturën për postin e Sekretares së Shtetit në Michigan, duke garuar si përfaqësuese e Partisë Demokratike. Në njoftimin e saj, Shkreli theksoi se vendimi vjen në një moment të rëndësishëm për mbrojtjen e proceseve demokratike në Shtetet e Bashkuara. “Prindërit e mi erdhën në këtë vend për të shpëtuar nga autoritarizmi. Tani, ndërsa këto kërcënime po shfaqen edhe këtu, jam e gatshme të mbroj demokracinë tonë, të mbroj Kushtetutën dhe të siguroj të drejtën e votës për çdo banor të Michiganit”, deklaroi ajo gjatë prezantimit të kandidaturës. Shkreli ishte shqiptarja e parë që kandidoi për Kongresin Amerikan në vitin 2016, ku mori mbështetje të gjerë, përfshirë edhe atë të familjes Clinton, ndonëse nuk arriti të siguronte votat e nevojshme për të fituar. Kandidatura e saj e re vjen në një kohë kur çështjet e sigurisë së zgjedhjeve dhe mbrojtjes së institucioneve demokratike janë tema qendrore në debatin politik amerikan. Me një karrierë të konsoliduar në shërbim publik, Shkreli shihet si një prej figurave premtuese dhe përfaqësuese të rritjes së ndikimit të komunitetit shqiptar në jetën politike të SHBA-së. https://x.com/suzannaformi/status/1998030266934206857?s=46
