Heqja e pagesës së semestrit nga Qeveria Kurti ishte lajm i mirë për studentët e Universitetit të Prishtinës, por e gjitha kjo zgjati për pak ditë, kur studentët u njoftuan se paraqitja e provimeve do të bëhet me pagesë, në rast të atyre që e paraqesin një provim për herë të dytë, shkruan KosovaPost.
Megjithatë lajm të mirë ka përsëri për studentët, kjo pasi “Studim Kritikë Veprim” kanë njoftuar në rrjetin social, Facebook se paraqitja e provimeve do të bëhet përsëri siç ka qenë kohë më parë, pa pagesë.
Postimi i plotë i “SKV”:
PARAQITJA E PROVIMEVE BËHET PA PAGESË
Më 15 nëntor, SKV ka dorëzuar në MAShTI kërkesën për heqjen e pagesave për ata që paraqesin provimet për herë të dytë e tutje.
Sot, kemi marrë konfirmimin se këto pagesa janë larguar. Ky është një lajm tjetër i mirë për studentët duke i ofruar atyre mundësi të barabarta për t’iu nënshtruar provimeve dhe duke lehtësuar procedurat e tjera administrative.
Gjatë ditës keni parë një komunikatë të Parlamentit Studentor (UDS-OPS-Paqja Studentore-USPE) në të cilën thuhet se: “Në këtë takim u shtruan ankesat dhe pakënaqësitë e studentëve ndaj këtij vendimi për znj. Nagavci, ku u njoftuam që pjesa ku përcaktohen pagesat për provime do të ndryshohet. Me plotësimet e reja parashihet që paraqitja e provimeve të jetë falas deri në tri herë”.
SKV mund të konfirmoj se ky është një keqinformim nga ana e tyre sepse pagesat janë larguar tërësisht sipas kërkesës sonë dhe jo vetëm deri në tri herë siç pretendojnë ata.
Tendencat e tilla për të përvetësuar kauzën tonë të kahmotshme janë tejet të ulëta. Të dashur kolegë studentë, ju kujtojmë se po me kërkesën tonë janë larguar edhe pagesat për regjistrimin e semestrit duke filluar nga ky vit akademik.
Arsim publik falas, pa pagesë semestri, pa pagesë paraqitja e provimeve.