Stafi i ushtrueses së detyrës së presidentes, Vjosa Osmani, kanë dhënë një përgjigje rreth vendimit të Gjykatës Kushtetuese, sipas të cilit, i ndalohet kandidimi në zgjedhje të reja, kryetarit të Lëvizjes Vetëvendosje, Albin Kurti.
Në përgjigjen nga presidenca, thonë se dënimi me kusht nuk krijon pasoja juridike.Sipas interpretimit të tyre, askush nuk mund të pengohet të kandidohet për deputet, përveç nëse është paraparë me ligj, e që siç thonë ata kjo gjë nuk është tek rasti i Albin Kurtit.
“Sipas Kodit të Vjetër Penal (Neni 100), dënimi me kusht nuk krijon pasoja juridike. Askush nuk mund të pengohet të kandidohet për deputet përveç nëse është paraparë me ligj (Neni 4, Ligji për Drejtat e Deputetit). Nuk ekziston ndonjë praktikë në demokraci të avancuara që dikush të parandalohet për vepra të kësaj natyre, përveç krimeve të larta dhe terrorizmit. Plus, në këtë rast vlenë parimi i ligjit më të favorshem për palën”, thuhet në përgjigjen e zyrës së presidentit, dhënë për Gazeta Blic.
Në anën tjetër, lidhur me vendimin e Gjykatës Kushtetuese ka folur edhe kryetari i Lëvizjes Vetëvendosje, Albin Kurti.Kurti tha se ende nuk e ka lexuar aktvendimin e Gjykatës Kushtetuese.
“Unë ende nuk e kam lexuar vendimin e plotë të Kushtetueses…Ne do ta japim qëndrimin tonë për tekstin e plotë të Aktgjykimit”, ka deklaruar Kurti në një prononcim në RTV Dukagjini.
I pyetur se çfarë mendon për deklaratat se ky vendim atij ja pamundëson kandidimin për deputetë.“Unë nuk dua t’i komentojë e interpretojë komentet e interpretimit të interpretimeve. Ne do ta japim qëndrimin tonë. Lëvizja Vetëvendosje pos që është subjekti më i madh në vend por ka shumicën e popullsisë së Kosovës në mbështetje të qartë”, deklaroi tutje Kurti.
“Kush do të jetë në listën për deputetë, me çfarë renditje dhe me cilin kandidatë për kryeministër shumë shpejt do të vendosin Këshilli i përgjithshëm dhe Kryesia e Lëvizjes Vetëvendosjes”.Kurti ka thënë se do të pres interpretimin që do ta bëjë Lëvizja Vetëvendosje për Aktgjykimin e Kushtetueses.Kurse, zgjedhjet e reja janë caktuar të mbahen me datë 14 shkurt.
