Dëshmitari Hansjeorg Strohmeyer, ka thënë se nuk i kujtohet që është takuar ose ka biseduar ndonjëherë me Kadri Veselin.
Madje, në një rast ai ka thënë se gjatë kohës kur ishte me mision në Kosovë, nuk e dinte as kush ishte Kadri Veseli, raporton “Betimi për Drejtësi”.
“Po absolutisht e saktë dhe sot e kësaj dite nuk më kujtohet një gjë e tillë”, ka thënë dëshmitari, duke u përgjigjur në pyetjet e avokatit të Veselit, Rodney Dixon.
Më pas, Dixon i ka thënë dëshmitarit se ish-gjenerali i UNMIK-ut, Mike Jackson, ka dhënë një deklaratë, në të cilën ka thënë që nuk i kujtohet se ka pasur ndonjë ndërveprim me Veselin ose ShIK-un. Pas kësaj, dëshmitari është pyetur se a e mban mend që Jackson t’i këtë thënë atij për ndonjë takim me Veselin.
“Jo, nuk më kujtohet”, ka thënë dëshmitari.
Kurse, i pyetur se a është e vërtetë se në aspektin civil ose ushtarak, Jackson nuk ka pasur ndonjë kontakt me Veselin, dëshmitari sërish tha se nuk i kujtohet që ai (dëshmitari) ka pasur ndonjë takim me Veselin.
“Unë flas vetëm për vete, por mua personalisht nuk më kujtohet asnjë rast që jam takuar me zotin Veseli”, ka thënë Strohmeyer.
Dëshmitari gjithashtu është pyetur se a e dinte që Veseli nuk ka qenë në Kosovë për pjesën më të madhe të kësaj kohe. Ai ka thënë se në atë kohë s’e dinte se kush ishte Veseli ose nëse ai ishte brenda ose jashtë Kosovës.
