Ministri i mbrojtjes Ejup Maqedonci, tha se paralajmërimet për sulme ndaj Kosovës në ditët e festave janë bërë për hirë të transparencës qytetarëve dhe jo për të shkaktuar panik.
Por, njohës të çështjeve politike dhe të sigurisë thonë se deklaratat për përshkallëzime të mundshme krijojnë frikë të panevojshme tek qytetarët. Sipas tyre, rreziqeve për sulme dhe veprimet destabilizuese do të marrin epilog me ardhjen e Trump në pushtet
Deklaratat e kryeministrit Kurti, “se Kosova rrezikon të sulmohet nga Serbia para ose pas vitit të ri” i ka ripërsëritur ministri i mbrojtjes Ejup Maqedonci duke përmendur si shkak se kryerësit e sulmit të 24 shtatorit janë ende të lirë. Sipas tij sulmet e fundit të cilat, siç tha, u kryen me urdhër të grupit terrorist u bënë në një datë të ndjeshme për Kosovën më 29 nëntor një ditë pas ditës së flamurit. Maqedonci tha se këto deklarata nuk kanë pasur qëllim të ndjellin panik ndër qytetarët por siç tha qeveria dëshiron të jetë transparente ndaj tyre.
“Normalisht që kohët kur këto grupe mund të kryejnë sulme janë kohët e ndjeshme dhe lidhen me data siç ishin ato të 29 nëntorit që ndodhi menjëherë pas sulmit të Rusisë në Ukrainë në infrastrukturën energjetike. Por, edhe për festa normalisht të nëntorit që ndërlidhen me festat në Kosovë por edhe vet në Serbi dhe qëllimi jonë nuk ishte të mbjellim panikë apo frikë tek qytetarët por që të jemi transparent”, tha Maqedonci.
Më 29 nëntor në fshatin Varragë të komunës së Zubim Potokut, nga një shpërthim u dëmtua kanali i ujit të Ibër-Lepencit. Policia bëri të ditur se shpërthimi nuk shkaktoi viktima por dëmet në kanal ishin të mëdha. Autoritetet në Kosovë thanë se në sulm janë përdorur deri në 20 kilogram mjete shpërthyese dhe bën përgjegjës për sulmin, Serbinë. Beogradi zyrtar i mohoi akuzat, ndërsa ambasadori i SHBA-ve në Beograd Christopher Hill, tha se SHBA-të nuk shohin prova se Serbia është e lidhur me këtë sulm. Ish-zëvendësministri i brendshëm, Valdet Hoxha thotë se Kosova në vazhdimësi është e rrezikuar nga Serbia, por sipas tij, qeveria me veprimet e pa koordinuara me bashkësinë ndërkombëtare ndodhet nën masa ndëshkuese nga BE-ja.
“Në këtë kuptim përveç ushtrimit të funksionit kushtetues duhet të ndërmarrim edhe veprime strategjike në mënyrë që të mos marrim veprime të njëanshme dhe të akuzohet Kosova për përshkallëzim të njëanshëm e pastaj të bajmë mbi supe barrën e masave dhe sanksioneve”, tha Hoxha.
Në anën tjetër, një numër veprimesh policore në veri të vendit të cilat u kundërshtuan nga Bashkësia ndërkombëtare me arsyetimin se cenojnë situatën e sigurisë e ka paraqitur Kosovën si kontribues në destabilizim të situatës së sigurisë, thotë ish diplomati Blerim Canaj.
“Në fakt shkon paralel me gjendjen të cilën e ka pasur Kosova dhe cilën është sepse deri para 4-5 viteve Kosova e ka promovuar vetën si faktor stabiliteti dhe paqeje dhe vet pavarësia e Kosovës është bërë për të sjellë stabilitet dhe paqe në rajon ndërsa tash pak ndoshta edhe nga mos dija ndoshta edhe qëllimshëm duke u marr më tepër se sa që duhet me veriun me qëllimin e zhvendosjes së vëmendjes Kosova është kthyer nga faktor stabiliteti në një çështje sigurie dhe këto katër vite i kaluan duke menaxhuar krizat”, tha Canaj për rtv21.
Megjithatë, sipas njohësve të çështjeve të sigurisë, shkaktimi i krizave dhe destabilizimi i situatës së sigurisë në veri të vendit i shkon në favor vetëm Serbisë dhe Rusisë si sponzorizues të këtyre krizave. Por, sipas tyre me ardhjen e administratës Trump, në SHBA, çështja e Kosovës do të marr epilog.
“Këtyre do të ju vjen fundi me ardhjen e administratës Trump sepse ai do të sjellë një epilog se njihet që përdorë diplomacinë e fuqisë”, tha Hoxha.
“Tash po besoj që luftës në ukrainë është duke i ardh fundi dhe SHBA-të duhet të ripozicionohen dhe qasja do të ndryshohet dhe dihet që Demokratët në vazhdimësi e kanë bërë politikat tëhiqe mos e këput, Republikanët e këpusin”, tha Canaj.
Aktualisht situata e sigurisë në veri të vendit është e qetë por e brishtë, ka bërë të ditur policia e Kosovës. Ndërkohë KFOR-i, ka rritur praninë e tij dhe ka shtuar patrullimet, në përpjekje për të ruajtur, siç thotë, paqen dhe sigurinë
