Kryetari i LDK-së, Lumir Abdixhiku, e ka pritur në takim lamtumirës ambasadorin e SHBA-së, Jeffrey Hovenier, ndërsa ka falënderuar ambasadorin për angazhimin e përkushtimin e tij si ambasador dhe si përfaqësues amerikan i viteve të shpalljes së pavarësisë.
Tutje është shprehur Abdixhiku se Hovenier ka qenë njohës i mirë i Kosovës, përfaqësues i mirë i interesave strategjike të SHBA-ve në Kosovë dhe kujdestar i përkushtuar i relacioneve mes dy popujve.
“E falënderova për gjithë angazhimin e gjithë përkushtimin e tij, jo vetëm si ambasador, por dhe si përfaqësues amerikan i viteve të shpalljes së pavarësisë. Jeff ka qenë njohës i mirë i Kosovës, ka qenë përfaqësues i mirë i interesave strategjike të SHBA-ve në Kosovë; dhe mbi të gjitha kujdestar i përkushtuar i relacioneve mes dy popujve!”, tha lideri i LDK-së.
E në shenjë mirënjohje Abdixhiku i ka dhuruar ambasadorit amerikan nga një fanellë të kombëtares së Kosovës 6 mbesave dhe nipit të Hovenier.
“Jeff, ka qenë pasionant i futbollit kosovar. Kemi ndjekur bashkë lojëra të shumta të Kombëtarës së Kosovës. Në LDK, u kujdesëm që si gjysh i 6 mbesave e 1 nipi që është – Charlotte, Oliver, Lucie, Jacqueline, Katherine, Madeline, Amelia – me të kthyer në shtëpi, t’u dhurojë atyre nga një fanellë të kombëtares sonë me emrat e tyre në to. T’i mbajnë si kujtim të përhershëm nga shteti i fundit ku ai shërbeu si ambasadorë.”, theksoi Abdixhiku
Për më tepër Abdixhiku pret që të vazhdojë bashkëpunimin e ngushtë dhe historik me ambasadorin e ri të administratës së re, të SHBA-së.
“LDK pret të vazhdojë bashkëpunimin e ngushtë dhe historik me ambasadorin e ri të administratës së re, të Shteteve të Bashkuara të Amerikës. Sepse lidhja jonë është ideologjike, është insitucionale, është afatgjate – tash e 35 vjet!”,shkruan Kryetari Abdixhiku në Facebook.
