Ministri i Mbrojtjes, Ejup Maqedonci, ka pritur në takim të dërguarin special të Britanisë së Madhe për Ballkanin Perëndimor, Stuart Peach, me çrast ka shprehur synimin dhe përkushtimin e Kosovës për anëtarësimin në strukturat euro-atlantike, përcjell Kosova Post.
Ministri Maqedonci, gjithashtu falënderoi Peachi për mbështetjen e Britanisë në sigurinë dhe integritetin territorial të Kosovës.
“Përsërita qasjen konstruktive të Kosovës ndaj paqes dhe integrimit në Bashkimin Evropian dhe në NATO”, tha Maqedonici.
Postimi i plotë i ministrit Maqedonci:
Ishte kënaqësi e veçantë të pres sot në takim të dërguarin special për Ballkanin Perëndimor të Kryeministrit të Mbretërisë së Bashkuar, Lord Suart Peach.
Diskutuam rreth situatës së sigurisë në vend dhe rajon, zhvillimin e FSK-së si dhe operacionin Interflex që po zhvillohet në Mbretërinë e Bashkuar me pjesëmarrje dhe të trupave të FSK-së.
E falenderova për mbështetjen e vazhdueshme që Mbretëria e Bashkuar i ka ofruar Kosovës në çështje të sigurisë, ruajtjes së integritetit territorial, veçanërisht me shtimin e trupave të saj në kuadër të KFOR-it pas sulmit në Banjskë.
Theksova se jemi të përkushtuar në ruajtjen e stabilitetit dhe përmbushjen e synimit tonë si shtet për anëtarësim në NATO dhe BE.
