Presidenti i SHBA-së, Donald Trump sinjalizoi një fund të rritjes së tarifave ndërmjet SHBA-së dhe Kinës që tronditi tregjet globale, sipas “Reuters”.
“Unë nuk dua që ato të shkojnë më lart, sepse në një moment të caktuar, njerëzit nuk do të blejnë”, u tha Trump gazetarëve duke iu referuar tarifave, në Shtëpinë e Bardhë.
Deklarata e Trump thekson më tej një oreks të zvogëluar për tarifa shumë më të larta ndaj dhjetëra vendeve – pasi tregjet reaguan ashpër pas njoftimit të tyre më 2 prill.
Presidenti republikan vendosi tarifa prej 10% për shumicën e mallrave që hyjnë në SHBA, por pezulloi zbatimin e tarifave më të larta, në pritje të negociatave.
Megjithatë, ai rriti normat e importeve kineze, në 145%, pasi Pekini u hakmor me kundërmasa.
Javën e kaluar, Kina tha se nuk do t’i përgjigjej “manipulimeve të tarifave” – një sinjal nga Pekini se tarifat e përgjithshme nuk do të rriteshin më tej.
Trump tha se Kina kishte qenë në kontakt që nga vendosja e tarifave dhe shprehu optimizëm se të dy vendet mund të arrinin një marrëveshje, shkruan oranews.al.Duke folur me gazetarët, Trump refuzoi të specifikonte natyrën e bisedimeve midis vendeve ose nëse ato përfshinin drejtpërdrejt presidentin kinez, Xi Jinping.
