Trump thotë se negociatorët tashmë kanë diskutuar “ndarjen e disa aseteve” dhe se ai do të flasë me Putinin të martën.
Presidenti amerikan Donald Trump tha se planifikon të diskutojë për përfundimin e luftës në Ukrainë me presidentin rus Vladimir Putin të martën dhe se negociatorët tashmë kanë diskutuar “ndarjen e disa aseteve”, raporton The Guardian.
“Do të flas me presidentin Putin të martën. Shumë punë është bërë gjatë fundjavës”, u tha Trump gazetarëve në Air Force One gjatë një fluturimi të vonë për në Washington nga Florida.
Trump po përpiqet ta marrë mbështetjen e Putinit për një propozim për armëpushim 30-ditor që Ukraina e pranoi javën e kaluar, ndërsa të dyja palët vazhduan shkëmbimet e rënda ajrore gjatë fundjavës dhe Rusia u afrua më shumë me dëbimin e forcave ukrainase nga pozicioni i tyre në rajonin rus të Kurskut.
Këto komente erdhën disa orë pasi i dërguari i tij i posaçëm amerikan, Steve Witkoff, tha se presidenti rus “pranon filozofinë” e armëpushimit dhe kushteve të paqes të propozuara nga Trump.
Witkoff i tha CNN-it se diskutimet me Putinin për disa orë javën e kaluar kishin qenë “pozitive” dhe “të orientuara drejt zgjidhjes”.
Por ai refuzoi të konfirmonte kur u pyet nëse kërkesat e Putinit përfshinin dorëzimin e forcave ukrainase në Kursk, njohjen ndërkombëtare të territoreve ukrainase të pushtuara nga Rusia si ruse, kufizime në aftësinë e Ukrainës për të mobilizuar trupa, ndalimin e ndihmës ushtarake perëndimore dhe një ndalim të forcave të huaja të paqeruajtjes.
Putin tha të enjten se ai mbështet një armëpushim, por përmendi detaje të shumta që tha se duhet të negociohet përpara se marrëveshja të finalizohet.
Moska, ndër të tjera, e kundërshton fort vendosjen e trupave europiane për të ofruar garanci sigurie për Ukrainën pas çfarëdo armëpushimi të mundshëm.
Të dielën, presidenti francez Emmanuel Macron tha se Rusia nuk ka nevojë të japë leje për këtë, duke theksuar se Ukraina është shtet sovran. “Nëse Ukraina kërkon forca aleate në territorin e saj, nuk i takon Rusisë ta pranojë apo ta refuzojë këtë”, tha ai në komente të cituara nga disa gazeta franceze.
Putin ka thënë se ndërhyrja e tij ushtarake në Ukrainë ndodhi sepse zgjerimi i vazhdueshëm i NATO-s e kërcënonte sigurinë e Rusisë, shkruan gazeta express. Ai ka kërkuar që Ukraina të heqë dorë nga ambiciet e saj për NATO-n, që Rusia ta mbajë kontrollin e të gjitha territoreve ukrainase të pushtuara dhe që madhësia e ushtrisë ukrainase të kufizohet.
