Deputetja shqiptare në Kroaci, Ermina Lekaj Prljaskaj ka thënë se vendosja e një stikersi serb mbi emblemën e Ambasadës së Kosovës në Kroaci është e papranueshme.
Ajo tha se ky incident po tenton të krijojë trazira në mbarë rajonin, duke e përdorur për të provokuar dhe përhapur panik pas ngjarjeve të fundit në Republikën e Kosovës.
“Incidenti i sotëm në Zagreb është i papranueshëm dhe shkakton pakënaqësi të thellë. Pres dhe shpresoj që të gjithë qytetarët, përfshirë edhe pjesëtarët e pakicës kombëtare serbe në Republikën e Kroacisë, të ruhen nga ky incident. Është e qartë se ky incident po tenton të krijojë trazira në mbarë rajonin, duke e përdorur për të provokuar dhe përhapur panik pas ngjarjeve të fundit në Republikën e Kosovës”, ka shkruar ajo.
Ajo tha se ky është një moment që kërkon dënimin e përbashkët të veprimeve të tilla dhe unitet për të ruajtur paqen dhe stabilitetin.
“Komuniteti shqiptar është i indinjuar nga ky incident dhe i bëjmë thirrje të gjithë qytetarëve për arsye, vetëpërmbajtje dhe solidaritet për të kapërcyer së bashku sfidat që na presin”.
