Presidenti ukrainas, Volodymyr Zelensky tha dje në mbrëmje se një delegacion i nivelit të lartë amerikan pritet të mbërrijë në Ukrainë këtë javë.
“Këtë javë, disa përfaqësues nga ekipi i presidentit Donald Trump, njerëz seriozë, do të jenë këtu në Ukrainë dhe do të zhvillohen takime të veçanta dhe bisedime”, tha Zelensky pas një takimi me presidenten e Bankës Evropiane të Investimeve, Nadia Calvino.
Zelensky nuk bëri të ditur se kush do të ishte pjesë e delegacionit.
Zëvendëspresidenti i SHBA-së, JD Vance pritet të marrë pjesë në Konferencën e Sigurisë në Mynih në Gjermani – e cila do të zhvillohet nga e premtja deri të dielën dhe pritet të fokusohet në luftën në Ukrainë. Zelensky do të marrë pjesë, gjithashtu.
Sipas raporteve të pakonfirmuara të medieve, përfaqësuesi special i SHBA-së për Ukrainën, Keith Kellog, i cili u emërua nga Trump, nuk do të udhëtojë në Ukrainë deri në fund të këtij muaji.
Ukraina është mbrojtur kundër pushtimit të plotë të Rusisë me mbështetjen perëndimore për gati tre vjet.
Trump po bën përpjekje për t’i dhënë fund luftës dhe ka thënë se ka në plan të flasë së shpejti me Zelensky, si dhe me presidentin rus Vladimir Putin.
Presidenti ukrainas, Zelensky tha javën e kaluar se takimet ishin planifikuar midis ekipeve ukrainase dhe amerikane.
