Delegacionet ukrainase dhe amerikane do të takohen sot (25 mars) në Arabinë Saudite pas bisedimeve Rusi-SHBA atje një ditë më parë mbi një propozim të kufizuar të armëpushimit të Detit të Zi që Uashingtoni shpreson se do të hapë rrugën për negociata më të gjera të paqes.
Bisedimet midis SHBA dhe Rusisë u portretizuan nga Uashingtoni si një mundësi për t’i dhënë fund luftës që ka zgjatur për më shumë se tre vjet. Një burim i Shtëpisë së Bardhë tha se ka pasur përparim në diskutimet e zhvilluara në Riad dhe një “njoftim pozitiv” mund të pritet së shpejti.
Negociatat mes përfaqësuesve të Rusisë dhe Shteteve të Bashkuara filluan të hënën në mëngjes dhe zgjatën më shumë se 12 orë.
Ndërkohë, Kremlini theksoi se nuk do të nënshkruhet asnjë dokument përfundimtar, megjithatë, një projekt-deklaratë e përbashkët pritet të publikohet së shpejti.
Shtëpia e Bardhë synon gjithashtu të arrijë një marrëveshje armëpushimi midis Ukrainës dhe Rusisë deri më 20 prill, e cila këtë vit përkon me Pashkët për Kishën Katolike dhe Ortodokse, sipas Bloomberg.
Ndërkohë, Ukraina dhe Rusia vazhduan sulmet e tyre, me Kievin që akuzoi Moskën për sulme raketore që plagosën 88 persona, dhe Moska për një sulm ukrainas që mori jetën e dy gazetarëve, shkruan A2CNN.Ministri i Jashtëm ukrainas, Andrii Sybiha, tha se Rusia duhet të ndalojë sulmet ndaj qyteteve të Ukrainës dhe të përfundojë luftën kundër civilëve.
