Kryetarja e Kuvendit, Elisa Spiropali e konsideroi 17 Shkurtin, shpalljen e Pavarësisë së Kosovës, ngjarjen më të madhe për Kosovën, Shqipërinë dhe kombin shqiptar.
Në fillim të seancës plenare të Kuvendit, Spiropali ftoi Kuvendin e Shqipërisë t’u përcjellë urimet vëllazërore me një duartrokitje popullit, vendit dhe institucioneve të Kosovës.
“Sot, në 17-vjetorin e shpalljes së Pavarësisë, e cila ka hyrë në histori si Dita e Pavarësisë së Kosovës, ju ftoj që nga kjo sallë, ne, deputetët e Kuvendit të Shqipërisë, t’u përcjellim urimet vëllazërore me një duartrokitje popullit, Kuvendit dhe institucioneve të Kosovës. Sot është njëkohësisht edhe Nëntori i 1912-ës, edhe 17 Shkurti i 2008-ës, në Republikën e Kosovës. Është moti i madh që e bëri Kosovën të lirë, të mosvarme dhe i shtoi Europës një flamur të ri në familje”, tha Spiropali.
Kryetarja e Kuvendit theksoi se “kurrë ndonjëherë si këto dy data bashkë nuk kanë shenjuar ngjarje më të madhe, e nuk kanë nisur rishtaz një epokë të re për shqiptarët, duke i çuar ata kah liria, kah pavarësia dhe vendosmëria për të shkruar vetë historinë tonë të përbashkët moderne”.
Në emër të Kuvendit të Shqipërisë, Spiropali përcolli urimet më vëllazërore për çdo qytetar të Republikës së Kosovës, për dëshmorët dhe mendimtarët dhe gjithë sakrificat e tyre të pafundme që bënë të mundur ngjizjen e ëndrrës së madhe të lirisë dhe drejtësisë historike.
“17 vjet më parë, në Kuvendin e Kosovës, në një seancë të jashtëzakonshme, Kryeministri Hashim Thaçi, lexoi deklaratën e Pavarësisë, si aktin suprem që shpallte Kosovën shtet të pavarur dhe sovran. Ai çast që shënjoi triumfin e ëndrrës së një populli dhe të një kombi të ndarë dhunshëm në dy pjesë, është dita e parë e historisë së një realiteti të ri gjeopolitik në rajon e Evropë, dhe gjithashtu triumf i të drejtës njerëzore për vetëvendosje, i luftës për të drejtat e njeriut dhe i të drejtave të kombeve për ta ndërtuar vetë fatin e tyre”, tha Spiropali.
Për Kryetaren e Kuvendit, ai çast ishte kulmimi i asaj lufte të pandërprerë dhe aspiratave shekullore të shqiptarëve të Kosovës.
“Nën frymëzimin e presidentit Ibrahim Rugova, qytetarët e Kosovës i rezistuan paqësisht dezintegrimit të egër të ish-Jugosllavisë dhe më pas, u përgjigjën edhe me luftën e Ushtrisë Çlirimtare të Kosovës. Dy ndeshje me sakrifica të paimagjinueshme, në një front për jetë a vdekje, në një sfidë mes qytetërimit, barbarisë e terrorit, në fund të shekullit XX”, nënvizoi ajo.
Spiropali shprehu mirënjohje pafund për gjithë martirët e asaj lufte, për gjithë ato jetë që u prenë në mes në këmbim të lirisë.
“Në këtë ndeshje të pashembullt, në krah të popullit të Kosovës dhe shqiptarëve të rajonit, ishte aleanca më e madhe politiko-ushtarake, e cila luftoi dhe fitoi betejën e parë antifashiste në Evropë që prej fundit të Luftës së Dytë Botërore. Kosova ishte në ato muaj dramatikë ndërgjegjja e lënduar e qytetërimit perëndimor, që vendosi t’i përgjigjet me forcën e të drejtës, forcës së verbër të regjimit gjakatar të Beogradit”, tha ajo.
Po ashtu, Kryetarja e Kuvendit shprehu mirënjohjen pafund për Shtetet e Bashkuara të Amerikës, Britaninë e Madhe e BE-në, NATO-n dhe gjithë vendet e tjera mike që bashkëmundësuan lirinë e Kosovës.
“Sot, Republika e Kosovës dhe Shqipëria janë dy gjysma të të njëjtës aspiratë, për t’u bërë së afërmi pjesë e Bashkimit Evropian. Janë dy flamuj, por një komb e një gjuhë. Kujtojmë nga kemi ardhur, dimë se ku do të shkojmë! Ne, në Kuvendin e Shqipërisë, mezi presim të vazhdojmë bashkëpunimin e paprerë, jetik e strategjik me institucionet e reja të Republikës së Kosovës që do të dalin nga zgjedhjet e 9 shkurtit, duke respektuar e nderuar shprehjen e lirë të vullnetit dhe votës së qytetarëve të Kosovës”, tha Spiropali, shkruan atsh.Kryetarja e Kuvendit siguroi se Shqipëria mbështet dhe është pjesë e pandarë e përpjekjeve të udhëheqësve, institucioneve dhe qytetarëve të Kosovës për zhvillim, progres e mirëqenie, për konsolidimin e vlerave dhe standardeve demokratike, integrimet euroatlantike dhe pranimin në organizatat ndërkombëtare të Republikës së Kosovës, si rrugë të vetme për të garantuar paqen dhe sigurinë në rajon e më gjerë.
