Në 30 ditët e ardhshme, Qeveria e Republikës Srpska (RS) tha se do të krijojë një marrëveshje që do t’i dërgohet entitetit tjetër të Bosnjës, Federatës së Bosnjës e Hercegovinës, për “ndarje paqësore”, njoftoi kryeministri i RS-së, Radovan Vishkoviq, pas mbledhjes së Qeverisë së Republikës Srpska në Srebrenicë të enjten, më 23 maj. Në këtë mbledhje mori pjesë edhe presidenti i RS-së, Millorad Dodik, i cili në vazhdimësi kishte kërcënuar me ndarjen e RS nga Bosnja.
Kësaj lëvizje i është përgjigjur ashpër ambasada amerikane në Sarajevë, e cila tha se “ndarja” e Republikës Srpska nënkupton fundin e saj dhe jo pavarësi për të.
“Dje, z. Dodik njoftoi se qeveria e Republika Srpskas mori një vendim zyrtar për të propozuar “shkëputjen” e RS-së nga Bosnja dhe Hercegovina. Kjo është ndarje e RS-së me një emër tjetër dhe është e rrezikshme, e papërgjegjshme, kundër Dejtonit dhe vë në rrezik integritetin territorial, sovranitetin dhe karakterin multietnik të BeH. Këto janë interesat thelbësore të SHBA-së. Shtetet e Bashkuara do t’i mbrojnë dhe ruajnë ato, ndër të tjera, duke i mbajtur përgjegjës për veprimet e tyre ata që i vënë në rrezik”, ka shkruar ambasada.
“Z. Dodik dhe qeveria e RS janë përpjekur të justifikojnë këtë vendim bazuar në një sërë gënjeshtrash dhe dezinformatash të krijuara për të frikësuar publikun e RS për t’i ndjekur ata në këtë rrugë të rrezikshme. Faktet janë të thjeshta dhe të drejtpërdrejta. Nuk ka asnjë konspiracion ndërkombëtar për të shfuqizuar RS dhe zoti Dodik nuk mund të tregojë një deklaratë të vetme të një zyrtari amerikan që bën thirrje për shfuqizimin e RS. BeH nuk është një bashkim i dy entiteteve. Siç thuhet në Marrëveshjen e Paqes të Dejtonit dhe Kushtetuta e BeH, Bosna e Hercergovina është shteti pasardhës i Republikës së Bosnjë dhe Hercegovinës. Kushtetuta e BeH nuk u siguron entiteteve apo ndonjë njësie tjetër nënshtetërore të drejtën e shkëputjes ose të “ndarjes”. RS mund të ekzistojë vetëm brenda Bosnje e Hercegovinës. Ndarja ose “shkëputja” e RS nuk do të thotë pavarësi e RS ose fundi i BeH, do të thotë fundi i RS”.
Ambasada amerikane tha se veprimet e Dodik vënë në rrezik një të ardhme brenda institucioneve euroatlantike që populli i BeH, përfshirë RS-në, e dëshiron, transmeton Gazeta Express.“Rruga e tij e propozuar do të siguronte që banorët e RS, fëmijët dhe nipërit e tyre të mos kenë jetën paqësore, të begatë dhe demokratike që meritojnë”, përfundon deklarata.
