Kanë mbetur edhe 4 ditë për të krijuar ekipin e Komitetit të Përbashkët Monitorues, që do të përcjell zbatimin marrëveshjes Kosovë – Serbi. Zëvendëskryeministri Besnik Bislimi ka thënë se Kosova e ka emëruar ambasadorin Agron Bajrami si kryesues të këtij komiteti. Njohësit e çështjeve politike kanë qëndrime të kundërta në lidhje me atë nëse ky emërim është i duhuri.
Edhe pak ditë bëhen një muaj që kur Kosova e Serbia, u dakorduan në Ohër, ndër tjera edhe për krijimin e komitetit monitorues për zbatimin e marrëveshjes dhe aneksit të saj.
Zëvendëskryeministri i Kosovës Besnik Bislimi në një intervistë për “Zërin e Amerikës” ka thënë se i emëruari i Kosovës për drejtimin e këtij komitetit është ambasadori i Kosovës në Bruksel, Agron Bajrami.
Ish-diplomati kosovar, Blerim Canaj thotë se emërimi i Bajramit në këtë pozitë, është një gjetje e mirë.
Por, profesori universitar Abit Hoxha thotë se angazhimi i ambasadorit Bajrami në këtë pozitë është ikje e institucioneve nga përgjegjësia.
Komiteti i Përbashkët Monitorues që do të kryesohet nga BE-ja, në bazë të aneksit të arritur në Ohër ka kohë të krijohet deri më datën 18 prill.
