“Ndalimi dhe mbajtja arbitrare, e pabazë dhe keqtrajtimi i qytetarëve nga ana e Serbisë, vetëm pse e përdorin atë si vend tranzit, na i solli kujtimet e hidhura të Serbisë së Millosheviqit, duke na rikujtuar se ajo ngelet e njëjta ngase udhëhiqet nga një ish-vartës i tij”.
Kështu deklaroi kryeministri Albin Kurti në mbledhjen e Qeverisë, një ditë pas bllokimit të qindra qytetarëve nëpër pikat kufitare serbe, si shenjë hakmarrje ndaj votimit të rekomandimit të anëtarësimit të Kosovës në Këshillin e Evropës.
Ai ka thënë se Serbia vazhdon të jetë burim i kërcënimit të paqes, sigurisë dhe stabilitetit të rajon, teksa ka shtuar se nuk ka demokraci në këtë vend.
“Serbia jo veç që nuk ka demokraci përbrenda, nuk respekton liritë civile e politike, sundim të ligjit e liri të mediave, por edhe ka rreshtim me Federatën Ruse, të cilën nuk e ka sanksionuar duke iu bashkuar kështu Bjellorusisë. Millosheviqin dhe Putinin, të cilët i ka përbrendësuar presidenti i Serbisë, e që duket se me sukses po i fsheh nga liderët demokratë, po i dalin në pah sapo të kthehet në Serbi sepse evropianizimi nuk ndodh me ninulla ruse”, ka thënë ai, transmeton RTKlive.
Tutje Kurti ka përmendur një varg marrëveshjesh të cilat Serbia i ka shkelur me veprimin e djeshëm.
“Me veprimin e djeshëm Serbia ka shkelur një grumbull marrëveshjesh duke përfshirë marrëveshjen e korrikut të vitit 2011 për lëvizjen e lirë të qytetarëve, marrëveshjen e nëntorit të vitit 2021 për lëvizjen me karta të identitetit në vendet e Ballkanit Perëndimor dhe marrëveshjen bazike të shkurtit të vitit 2023 në Bruksel për normalizim marrëdhëniesh dhe për fqinjësi të mirë”, ka thënë Kurti.
Kurti: Jankoviq është dërguar në Rashkë
Kryeministri Albin Kurti, për arrestimin e zëvendësdrejtorit të Policisë së Kosovës, Dejan Jankoviq ka thënë se dërgimi i tij në Rashkë nënkupton intervistimin nga akterë shtetërore të Serbisë.
“Sipas informatave që kemi zëvendësdrejtori Jankoviq është dërguar në Rashkë. Nga e kaluara e dimë që ata që janë dërguar atje, intervistohen nga akterë të ndryshëm shtetërore të Serbisë. Dje në ndalim kanë qenë 10 pjesëtarë të Policisë së Kosovës, serb dhe shqiptarë”, ka thënë Kurti në hyrje të mbledhjes së Qeverisë së Kosovës.
Nga këta pjesëtarë të policisë, pesë janë liruar ndërkaq pesë vazhdojnë të mbesin në mbajtje. Në mesin e tyre është edhe zëvendësdrejtori i Policisë.
Kurti teksa ka përmendur emrat e pesëshesh së policëve të ndaluar, ka rezultuar se 4 janë të komunitetit serb, ndërkaq një është shqiptar.
Kurti kërkon hapjen e arkivave për krimet e Drenicës
Kryeministri Albin Kurti teksa ka folur për bllokimin e autobusëve, ka thënë se ngjarja ka ndodhur në kohën e përkujtimit të masakrave në Paklek e Çikatovë të Drenicës.
Me këtë rast ai ka ritheksuar kërkesën për hapje të arkivave për krimet e kryera në këtë rajon.transmeton rtk.“Duke u mbështetur në marrëveshjen e arritur me 2 maj të vitit të kaluar në Bruksel, e përsërisim kërkesën për hapjen e arkivave të Brigadës së 37-të, të motorizuar të ushtrisë jugosllave, përgjegjëse kryesore për shumë masakra në rajonin e Drenicës”, ka deklaruar ai.
