Një dokument i marrëveshjes mes shkollës dhe prindërve, në të cilën nënës dhe babait i referohej me termet “prindi 1 dhe prindi 2” në shkollën “Elena Gjika” në kryeqytet ka bërë bujë në rrjetet sociale dhe ka ngjallur reagim të madh të prindërve të kësaj shkolle.
Ky dokument shkaktoi debat edhe në opinionin e gjerë. Megjithatë, Drejtoria e Arsimit në Komunën e Prishtinës përmes një sqarimi ka thënë se ky dokument është hartuar gjatë vitit 2023 nga grupet punuese të shkollave dhe është në përputhje me praktikat evropiane.
“Ai kërkon nënshkrimin e të dy prindërve dhe ka për qëllim të forcojë bashkëpunimin ndërmjet shkollës dhe prindërve për të siguruar angazhimin e plotë në edukimin e fëmijëve. Ka pasur keqkuptime, ku disa prindër e kanë ndërlidhur këtë marrëveshje me procese të tjera, të cilat nuk janë objekt i këtij dokumenti. Për DKA, është thelbësore që të dy prindërit të jenë të angazhuar dhe të kontribuojnë në mënyrë të barabartë në procesin arsimor”, thuhet në reagimin e Drejtorisë së Arsimit.
Ndaj reagimeve të prindërve është sqaruar edhe drejtoria e shkollës “Elena Gjika”, e cila ka shprehur keqardhje për çdo shqetësim të mundshëm.
“Kjo draft -marrëveshje është hartuar nga grupe punuese të shkollave gjatë vitit të 2023 dhe është në harmoni me praktikat evropiane për nënshkrim nga dy prindërit. Është vërejtur se disa prindër e kanë ndërlidhur me procese të tjera, për çka shkolla nuk ka pasur këtë qëllim. Për shkollën është e rëndësishme që dy prindërit të jenë pjesë e shkollimit dhe garantues i bashkëpunimit e ndarjes së përgjegjësisë në të mirë të fëmijëve. Ne ndajmë keqardhje për çdo shqetësim të mundshëm që kjo situatë mund të ketë shkaktuar”, thuhet në reagimin e shkollës.
