Kryeministri Albin Kurti, gjatë qeverisjes së tij tri vjeçare nuk ka lënë anash edhe komunitetet jo shumicë, përkundrazi ai përveq angazhimeve tjera në mirëqenien e tyre, ka krijuar edhe fondin e veçantë në vlerë prej 3 milionë euro në mbështetje të tyre në fusha të ndryshme, përcjell Kosova Post.
Ndërsa, flet për angazhimin e veçantë, kryeministri Kurti i shpalos detaje duke kujtuar kështu mbështetjen e komunitetet joshumicë edhe përmes granteve për fermerë dhe punësimin e tyre.
“Përmes tij financuam 259 grante për fermerë, ndërmarrës të rinj dhe OJQ me qëllim nxitjen e punësimit te këto komunitete. Një vit më herët mbështetëm 123 projekte për biznese të vogla dhe ndërmarrëse nga radhët e të gjitha komuniteteve. Kurse këtë vit lansuam masën e veçantë të punësimit për 2,000 punëkërkues që jetojnë në komunat e Leposaviqit, Zubin Potokut, Zveçanit dhe Mitrovicës së Veriut. Atje tashmë kemi hapur Zyre të Punësimit dhe Zyrat e Agjencisë së Regjistrimit të Bizneseve. Te këto të fundit, së fundmi janë regjistruar mbi 50 biznese të reja”, tha Kurti.
Për më tepër, kryeministri tha se komunitetet joshumicë përbëjnë 17% të subvencioneve të Ministrisë së Ekonomisë për pajisje efiçiente, në kuadër të masave për efiçiencë të energjisë. Ato sipas kryeministrit gjithashtu përbëjnë 9% të praktikantëve me pagesë përmes programit të Ministrisë së Financave, Punës dhe Transfereve “Kosova Generation Unlimited”, përqindje kjo përfaqësuese në raport me tërësinë e popullatës.
“Në kuadër të Programit të Stabilizimit të Komuniteteve, në bashkëpunim me Bashkimin Evropian, Ministria për Komunitete dhe Kthim ka zbatuar 415 projekte të ndryshme përmes së cilave janë siguruar 543 vende të reja të punës, prej tyre 328 me orar të plotë, pjesa tjetër me orar të pjesshëm. Në bashkëpunim me Bashkimin Evropian gjithashtu janë ndërtuar ose rinovuar 116 shtëpi, për të siguruar kështu kthim të qëndrueshëm për komunitetet joshumicë. E përmes Ministrisë së Administrimit të Pushtetit Lokal, kemi ndarë edhe 3 milionë euro për ndërtimin dhe rinovimin e shtëpive bashkë me 4 milionë tjera gjatë viteve 2021-2024 për projekte infrastrukturore prej të cilave përfitojnë veçanërisht pjesëtarët e komuniteteve joshumicë në komuna të vendit tonë”, ka shtuar Kurti.
Ai kujton edhe themelimin e Grupit ndërinstitucional për promovimin e punësimit të romëve, ashkalive dhe egjiptianëve, por edhe procesin e verifikimit të diplomave të Universitetit të Mitrovicës së Veriut. Gjithashtu, Kurti ka përmendur edhe transmetimin e drejtpërdrejtë të mbledhjeve të Qeverisë në gjuhën serbe, krahas respektimit të ligjit për përdorim të gjuhëve në komunikata për media dhe njoftimet nga Zyra e Kryeministrit.
“Republika është e të gjithë qytetarëve. Qeveria jonë është për të gjithë qytetarët”, është shprehur kryeministri Kurti.
