Lidhja e Shkrimtarëve të Kosovës sot në orën 12:00 në Prishtinë mban akademinë letrare artistike “Ora e Lirisë”, një manifestim tradicional që organizohet për të tetën herë me radhë.
Ky aktivitet shënon Ditën e Dëshmorëve të Kombit, Epopenë e Ushtrisë Çlirimtare të Kosovës (UÇK) dhe nderimin e Komandantit Legjendar, Adem Jashari.
Në një intervistë për RTK, Shyqri Galica, kryetar i Lidhjes së Shkrimtarëve të Kosovës, foli për këtë akademi. “Është viti i tetë që e organizojmë akademinë letrare artistike me krijime poetike dhe japim çmimin letrar ‘Adem Demaçi’, duke pasur parasysh krijimin dhe veprimtarinë e ndonjërit nga pjesëmarrësit e kësaj akademie”, tha ai.
Ai tutje tha se tema e luftës së Ushtrisë Çlirimtare të Kosovës është trajtuar në përgjithësi nga poetët, prozatorët dhe nga artistët, por sipas tij, kohëve të fundit kjo temë po përmendet më pak.
“Unë jam i lidhur drejtpërdrejtë me krijuesit dhe në shumë raste ndodhë se pothuajse as gjysma e tyre nuk e përmendin UÇK-në, dhe unë nuk e di pse po ndodhë kjo”, tha Galica.
Ai theksoi se tema e Ushtrisë Çlirimtare të Kosovës nuk shuhet kurrë, por që duhet një përkushtim i madh për të shkruar për të.
“Mendoj që njerëzit druhen sepse për UÇK-në nuk mund të shkruaj kushdo. Për gjakun e derdhur, për historinë, për lavdinë e atyre që kanë rënë, do të duhet të shkruhet gjithmonë. Prandaj, njerëzit druajnë. Sikur për dashurinë që shkruajnë të gjithë, por jo të gjithë e arrijnë atë që e synojnë. Unë mendoj që për këtë temë duhet të shkruash mirë, ose të mos shkruash fare”, tha tutje Galica.rtk.
