Mytaher Haskuka është duke e synuar edhe një mandat të dytë, për ta qeverisur Prizrenin. Ai po përgatitet që ditën e diel, të korrë fitore, ndërsa po e zgjeron listën e bashkëpunëtorëve dhe mbështetësve, transmeton Kosova Post.
Haskuka së fundi ka marr përkrahje edhe nga kryetari i KDTP-së Fikrim Damka, njëherësh Ministër i Zhvillimit Rajonal.
“Falënderoj kryetarin e Partisë Demokratike Turke (KDTP), Fikrim Damka që iu përgjigj kërkesës së qytetarëve për të bashkë qeverisur më shumë për Prizrenin. Qeverisja e mirë dhe bashkëpunimi i mirëfilltë gjatë këtyre katër viteve, do të vazhdojë edhe në mandatin e ardhshëm, për të çuar përpara projektet madhore në interes të të gjithë qytetarëve të Prizrenit!” – ka shkruar Haskuka në Facebook.
Më tutje ai ka shtuar se:
“Me kryetarin Damka kemi pasur një bashkëpunim të mirë edhe si ministër i Zhvillimit Rajonal, i cili ka rezultuar me projekte të rëndësishme për Prizrenin. Ky bashkëpunim i suksesshëm do të vazhdojë edhe në të ardhmen, si në nivelin lokal, ashtu edhe në nivelin qendror.”
Haskuka do të zgjidhet për herë të dytë në krye të Prizrenit, po qe se do t’ia dalë ta ruaj epërsinë ndaj kundër-kandidatit të PDK-së Shaqir Tolaj, edhe në raundin e dytë të zgjedhjeve lokale, që do të mbahen këtë të diele./KosovaPost/