Të martën pritet të mbahet seanca konstituive e Kuvendit të Kosovës, e cila do të shënojë edhe hapat e parë drejt formimit të institucioneve të reja pas zgjedhjeve të 9 shkurtit.
Grupi i komuniteteve jo-serbe ka bërë të ditur se do të mbështesë kandidatin e Lëvizjes Vetëvendosje për kryetar të Kuvendit, si dhe qeverinë që sipas tyre, do të udhëhiqet nga Albin Kurti.
Ministri në detyrë i Administratës së Pushtetit Lokal, Elbert Krasniqi, para mediave ka theksuar se ata tashmë e dinë emrin që do të propozohet nga LVV për kryeparlamentar, por zgjodhën të mos e bëjnë publik ende.
“Ne jemi grupi parlamentar i komuniteteve. Në këtë grup do të jenë së paku edhe dy deputetë të KDTP-së, partisë turke. Jemi 7 aktualisht, që nënkupton se do ta votojmë kryetarin e Kuvendit dhe qeverinë”, ka shprehur Krasniqi.
Ai ka theksuar se përkrahja për qeverinë Kurti është e natyrshme, duke theksuar rezultatin e fortë që kjo parti ka marrë në zgjedhje.
“Ne jemi për qeverinë Kurti, për shkak se Kurti i ka fituar zgjedhjet edhe ka shumicën e shqiptarëve. Edhe tash po i relativizojmë numrat – është 42.3%, thuajse sa të gjithë të tjerët bashkë”, ka theksuar ai.
Po ashtu, edhe deputetja boshnjake dhe kryetarja e NDS-së, Emilja Rexhepi, ka theksuar se nesër do ta votojnë emrin e propozuar nga LVV-ja për kryetar të Kuvendit.
“E shohim tani si është procedura dhe unë besoj që Qeveria Kurti 3 votohet shpejtë. Për kush është kandidat për kryeparlamentar. Na e dimë kush është mirëpo duhet me thanë kryeministri”, ka shtuar ajo, shkruan dukagjini.E pyetur nga gazetarët nëse ka marrë ftesë për diskutime nga PDK, LDK apo AAK, ajo ka thënë se nuk është ftuar nga asnjëra prej këtyre partive. Të njëjtën gjë e ka konfirmuar edhe Elbert Krasniqi.
