Është mbajtur mbledhja komemorative për Faik Rexhepin, burrin i cili u shndërrua në simbol të rezistencë kundër Sllobodan Millosheviqit, me aktin e tij të qëndresës në sheshin e Prishtinës.
Kryeministri në detyrë, Albin Kurti, nën patronazhin e të cilit u mbajt ky organizim, tha se Rexhepi shpërfaqi qëndrimin e tij stoik.
“Janë fort të rralla rastet dhe aq të paktë njerëzit që arrijnë të ngjiten nga rëndomtësia dhe të bëhen simbol i ngjarjeve të rëndësishme politike e të kohës. Një nga këto raste e këta njerëz është Faik Rexhepi”, tha Kurti.
Ai më tutje përngjasoi qëndrimin e Rexhepit me odën shqiptare ndër vite.
“Në atë kohë po mbahej një takim i delegacionin amerikan, mijëra njerëz donin të ia bënin me dije që ata ishin shumë të dashur për ne dhe t’u tregohej se ishim të diskriminuar. Mes mijëra njerëzve, ai qëndroi ulur në tokë me një qëndrim stoik. Qëndrimi i Faik Rexhepit është qëndrimi i dikujt në odën shqiptare, ashtu qëndrojmë ne këmbëkryq dhe kuvendojmë nëpër oda. Na ishte suprimuar autonomia, nuk mund të mblidhej parlamenti, Republika ishte shpallur dhe në shesh të Republikës së Kosovës së okupuar, mbin oda shqiptare me emrin e përveçshëm”, theksoi Kurti.
Kurse në emër të familjes Rexhepi, foli e bija e Faik Rexhepit, Albana Rexhepi – Deralla.
“Në jemi dëshmitar të bindjeve të palëkundura dhe angazhimit të tij për të luftuar shtypjen. Ai ka besuar se ne duhet të jemi aktiv dhe jo vetëm spektator të jetës”, tha ajo.
Faik Rexhep u kujtua edhe nga miku i tij, Dibran Gashi.
“Faikun e gjeta në ‘Feronikel’. Fillimisht e njoha si figurë i cili punonte si kimist. Në shumë lëvizje ndër vite të cilat pasuan, ai me la përshtypje të një njeriu patriot dhe atdhedashës”, tha ai.
Faik Rexhepi, i cili punonte në ndërmarrjen “Feronikeli” në Drenas, në gusht të 90-ës bashkë edhe me kolegët e tjerë kishin dalur që ta prisnin një delegacion të Kongresit amerikan. Me këtë rast, policia serbe kishte ndërhyrë ashpër, duke tentuar që ta shpërndante masën.
Por, i vetmi që nuk kishte lëvizur nga vendi ishte Faiku, i cili u ul këmbëkryq midis turmës. Kohë më parë në vendin ku ai protestoi u vendos një monument që u quajtur “Burri që s’luajti vendit!”, në shenjë nderimi për veprën e tij.
