Kryeministri Albin Kurti ka thënë se atij nuk i ka munguar vullneti për të shkruar draftin e Qeverisë për Asociacionin, por është refuzuar. Ai ka thënë se Asociacioni është çështje që duhet të trajtohet përbrenda Kosovës dhe nuk mund të imponohet.
“Unë kam shprehur gatishmërinë që ta shkruaj këtë draft status dhe është shumë mirë që faktorët ndërkombëtar po binden që këtë mund ta trajtojmë vetëm si çështje të brendshme të Kosovës. Më lejoni të theksoj se jam kryeministër i Republikës demokratike, kryeministrat nuk formojnë asociacione të komunave, ato asociacohen, bashkëpunojnë. Ju të gjithë e dini se ne e kemi një asociacion të komunave të Kosovës. Nëse dikush e dëshiron një tjetër, ajo duhet të vjen nga komunat. Nuk formon kryeministri asociacione të komunave, e as nuk i themelon ato”, ka thënë ai gjatë konferencës për media me ministrin e Financave, Hekuran Murati.
“Nëse Asociacioni është i imponuar prej lart e prej larg, nuk është Asociacion. Për të qenë asocim duhet të jetë liri dhe e drejtë, unë kam ofruar të shkruaj, jam refuzuar. Ju e dini se jam i gatshëm për dialog por kam kërkuar ta nënshkruaj marrëveshjen. Por, cili është kuptimi të bësh marrëveshje dhe në fund thua s’e nënshkruaj dot”, ka thënë i pari i Qeverisë.
Ai ka folur për deputeten serbe, Daniela Vuçiq dhe mos gatishmërinë e palës serbe për bashkëpunim.
“Unë kam ofruar që ta shkruaj draft statusin me datën 18 mars të vitit 2023 në Ohër të Maqedonisë së Veriut, por aty jam refuzuar. Më është thënë që këtë duhet ta bëjë ekipi menaxhues. Ekipi menaxhues në krye me deputeten e Kuvendit të Serbisë nga partia e presidentit atje, Daniela Vuciq e shkroi diçka që ishte edhe më keq se Republika Serbe, këtë e panë edhe ndërmjetësit. Është e njëjta deputete që në rrjete sociale i thurr lavde Milan Radoiçiqit, kryekriminelit të vrasjes së heroit të Kosovës, Afrim Bunjaku”, ka thënë Kurti, duke kërkuar dorëzimin sa më parë të kryekriminelit Radoiçiq tek autoritetet e Kosovës.
