Kryeministri Albin Kurti në konferencën përmbyllëse të Javës së Gruas e ka ndërlidhur barazinë gjinore me pavarësinë ekonomike.
“Barazia gjinore është në thelb të barazisë shoqërore. Ndërkaq, barazia shoqërore është ajo që i jep kuptim rritjes ekonomike sepse pikërisht përmes saj zhvillimi dhe rritja bëhen progres për të gjithë”, ka thënë ai.
Si hapa që luftojnë pabarazinë ekonomike, Kurti ka përmendur shtesat për 60,000 lehonat – nënat për herë të parë dhe shtesat për mbi 400,000 fëmijë nën moshën 16 vjeçare. Ai ka thënë se hapi i dytë është krijimi i kushteve që i mundësojnë vajzave dhe grave të zhvillohen, si edukimi falas, bursat, katërfishimi i pjesëmarrjes së grave në pozita vendimarrëse në ndërmarrje publike, transmeton RTKlive.
“Në Kosovë pabarazia gjinore thellohet nga mungesa e qasjes ekonomike, që është e lidhur ngushtë me barrierat e tjera të cilat kontribuojnë në shtypjen e grave në shoqëri. Për neve si Qeveri është kritike të lirojmë qytetarët nga barra ekzistenciale dhe të krijojmë një hapësirë për qytetarët që të trajtojmë çështjet që nuk mund të zgjidhen nëse mbijetesa është në rrezik”, është shprehur kryeministri.
Konferenca ka vazhduar me panelin e përbërë nga krerët e grupeve parlamentare të Kuvendit të Kosovës, Mimoza Kusari – Lila, Abelard Tahiri, Arben Gashi, Besnik Tahiri e Enis Kervan.
