Kryeministri Edi Rama rikonfirmoi sot se Shqipëria do të mbyllë TikTok-un për një 1 vit, ndërsa do të shikohet se si do të evoluojnë gjërat me masat e sigurisë.
Në konferencën e fundvitit me gazetarët, Rama tha se ky vendim ka qenë i mbështetur nga mbi 90% e prindërve të anketuar.
“Nuk lëvizim nga vendimi që kemi marrë. Siç e kam paralajmëruar, është një vendim për të cilin do të na duhen 6-8 javë”, tha Rama.
“Ka një presion të madh mbi rrjetet sociale për të marrë më shumë masa. Me siguri edhe TikTok mund të jetë në kërkim të marrjes së masave e krijimit të garancive, por ne nuk kemi kohë për të pritur sepse është një moment që duhet mbajtur një qëndrim i fortë dhe ky është vendim i mbështetur nga mbi 90% e prindërve të pyetur e anketuar”, tha Rama.
Lidhur me sigurinë në shkolla, Rama solli në vëmendje projektin e monitorimit me kamera, një proces sipas tij transparent dhe i monitorueshëm.
“Kjo për këdo që do të dojë të dijë. Jo Big Brother, por nëse do të dojë të dijë një prind se çfarë ndodhi, opinioni publik apo drejtuesi i shkollës për ecurinë e mësimit të gjitha do të jenë të dokumentuara dhe transparente”, tha Rama.
Po ashtu, kryeministri theksoi se edhe vetë hyrja në shkollë do të jetë e një niveli shumë të lartë sigurie.
“Do të jetë e pamundur për të penetruar çfarëdo qoftë nëpër xhepa. Kjo do të rrisë shumë nivelin e sigurisë. Ky është një projekt për të cilin kemi mbi një vit që punojmë. Ka pasur sukses dhe ka shënuar rënie të të gjitha llojeve të problematikave si bullizimit, mungesave, celularëve etj në vendin ku është aplikuar. Do të jetë një nga krenaritë e mandatit tonë të katërt”, shtoi Rama. atsh.
