Kryeministri Edi Rama u shpreh sot se Shqipëria është vetëm 2 vite larg përfundimit të gjithë procesit historik të negociatave me Bashkimin Europian.
Në një komunikim live në rrjetet sociale, Rama theksoi se është këtu që të vendosë “Albania” tek tryeza e Këshillit Evropian.
“Jam këtu për të marr hak për jetën time kur kam qenë emigrant dhe pavarësisht se nuk flija nën ura dhe ato historitë idiote që kanë treguar, por kur kaloja kufirin e aeroporteve, jepja pasaportën shqiptare dhe më shihte polici sikur po shikonte dikë që po hynte në vendin tjetër për të bërë ndonjë akt terrorist”, tha Rama.
Kryeministri tha se ka qenë emigrant dhe është këtu për të marrë hak për mënyrën sesi janë sjellë me shqiptarët ata të cilët nuk i njihnin apo ata, të cilët ishin racistë.
“Unë jam këtu për të marrë hak mbi të gjitha poshtërimet që u janë bërë shqiptarëve dhe shqiptarëve domethënë edhe mua vetë personalisht në gjithë vitet e historisë sonë, poshtërime që ia kemi bërë ne vetes sepse armiqtë më të mëdhenj të shqiptarëve kanë qenë vetë shqiptarët që të jemi shumë të saktë bashkë me njëri-tjetrin, por edhe të tjerët dhe jam këtu për të marrë hak për fëmijët tanë, për fëmijët e mi, për atë më të voglin se ata më të mëdhenjtë janë mjaftueshëm të mëdhenj tani të marrin hak vetë po të duan dhe për të gjithë ata si ai që të jenë të barabartë, përfundimisht dhe që mos i shohë njeri nga lart poshtë shqiptarët”, shtoi ai.
“Jam këtu për të marrë hak për të gjithë emigrantët që janë në Greqi, për të gjithë emigrantët që janë në Itali, për të gjithë emigrantët që janë në Angli që janë akoma me dy emra edhe nuk kthehen dot tek emri origjinal sepse kur janë regjistruar aty si refugjatë lufte të Kosovës për shkak se ishin pa bukë. Atyre që më thonë shpopullimi u them shikoni sa ka qenë numri i atyre që kanë ikur dhe kur kanë ikur. Patjetër që gjatë gjithë kësaj periudhe dhe më mbrapa deri kur të futemi në Bashkimin Europian, edhe disa vite të tjera do vazhdojnë shqiptarët të kërkojnë jetën e tyre gjetkë, se nuk jemi më në bunkerin e Enver Hoxhës. Jemi në një botë që është bërë e vogël sa një fshat dhe të gjithë kanë të drejtë sidomos ata që janë të rinj ta tentojnë, të kapin qiellin po të duan, por ama boll me këto”, tha ai.
Por, kryeministri theksoi se në qoftë se do ishte sado pak e vërtetë gjithë ajo baltë dhe do kishte sado pak të vërtetë në gjithë atë llum për Shqipërinë, nuk do ishim në 2 vite larg përfundimit të procesit historik të negociatave.
“Fundi i 2027-tës, 2 vite, përfundimit të gjithë procesit historik të negociatave me Bashkimin Evropian dhe të të gjithë procesit historik të ngjitjes drejt një maje që nuk e shihnim kurrë, tani e shohim. Është 2 vite. S’do ishim këtu ne sepse Bashkimi Europian, dëgjoni këtu, nuk bën politikë dashamirëse dakord, kur vjen puna te negocimi. Çfarë do të thotë nuk bën politikë dashamirëse? Nuk të fal asnjë gjë! Zero! Nuk të fal asnjë gjë nëse ti nuk plotëson të gjitha kriteret, nëse organizmi yt nuk është i pastruar nga të gjitha llojet e infeksioneve të mëparshme të marra nga e shkuara, nuk të pranon”, theksoi ai, shkruan atsh.Sipas Ramës, politikë Bashkimi Evropian bën vetëm kur të pengon.
“Ti mund t’i kesh bërë detyrat, por për arsye interesash, dhe për arsye të momentit, një vend, një vend, një vend të pengojnë. Kurse të bëjnë politikë që të thonë hajde se po mbyllim sytë se këta janë narko, por ne do t’i marrim. Se këta janë të korruptuar, por ne do t’i marrim. Se këta s’kanë bërë asnjë përparim, por ne do t’i marrim. Këtë duhet ta harroni. Nuk ndodh kjo! Nuk ndodh kjo! Sepse është një sistem tërësisht tjetër dhe ne po futemi në atë sistem. Ne po bëhemi siç u bënë emigrantët shqiptarë kur arritën më në fund të marrin pasaportën atje dhe kur arritën t’i imponohen vendeve atje, me qytetarinë e tyre dhe morën pasaportën. Siç morën shqiptarët në Gjermani, pasaportën gjermane, siç morën shqiptarët në Itali, pasaportën italiane, siç morën shqiptarët në Greqi, pasaportën greke ku shtetet e atjeshme i njohën si qytetarë të barabartë dhe sot janë qytetarë të dyfishtë, kështu do të jemi dhe ne. Këtë po bën Shqipëria”, tha ai.
