Ministri i Financave, Hekuran Murati, në një konferencë për media ka folur për rritjen e faturave të tatimit në pronë.
Murati tha se iu takon komunave që të vendosin për shkallën tatimore se sa duhet të jetë.
Ai tha se janë të gatshëm të mbështesim çfarëdo kërkese që kanë komunat për uljen e tatimit të vitit aktual, shkruan Reporteri.net.
Sipas tij, kjo do të bëhet në mënyrë që të mos ngarkohen qytetarët. Murati konsideron se disa nga komunat kanë bërë politikë me këtë çështje, gjë që ai tha se është e padrejtë.
“Ne si ministri jemi të gatshëm të mbështesim çfarëdo kërkese që kanë komunat për uljen e tatimit të vitit aktual, qoftë duke shkuar për të gjithë njësoj, qoftë duke marrë një prag ose duke marrë një përqindje të rritjes për ta falur si tatim në mënyrë që të mos ngarkohen qytetarët. Synimi ynë si ministri e edhe i Qeverisë është që të ndihmohen qytetarët sidomos në kohë të vështira, mirëpo konsideroj se nga disa komuna është bërë e padrejtë duke bërë politikë me këtë çështje”, tha Murati në konferencën për media.
Murati tutje deklaroi se ligji është që nga viti 2018 në fuqi.
Ai tha se ligji i miratuar në vitin 2018 për tatimin në pronë, ishte i miratuar nga qeveria Mustafa në vitin 2017, kur ministër ishte Avdullah Hoti, por tha se ky ligj s’ishte miratuar në Kuvend sepse qeveria kishte rënë.
Ai u shpreh se ligji i njëjtë ishte proceduar në qeverinë Haradinaj disa muaj më vonë, me ç’rast ishte miratuar dhe në janar të vitit 2018 kishte hyrë në fuqi.
