Ministri pa portofol i ngarkuar për bashkëpunim ekonomik ndërkombëtar Nenad Popoviq ka thënë se për Serbinë është e papranueshme nëse kushti final për anëtarësimin e saj në Bashkimin Evropian është ‘heqja dorë nga Kosova’.
“Serbia duhet të forcojë bashkëpunimin e saj me BRICS si organizatë dhe me çdo vend anëtar individual. Nuk ka dyshim se këto janë vende mike, të cilat e kuptojnë politikën tonë për të mbetur sovrane dhe të pavarura dhe të cilat në të njëjtën kohë po zhvillohen me shpejtësi dhe ngadalë po krijojnë një pol krejtësisht të veçantë në skenën ndërkombëtare”, tha Popoviq në një intervistë për Vecernje Novosti.
Ai deklaroi se “në situatën e një procesi shumë të komplikuar të integrimit evropian me një afat të paqartë për përfundimin e tij, Serbia nuk duhet të privojë veten nga mundësia për të ndërtuar partneritete në botë që mund ta ndihmojnë atë të mbrojë interesat e saj kombëtare”.
Popoviq – i cili është i sanksionuar nga Shtetet e Bashkuara për lidhjet e tij me Rusinë – mori pjesë në një tubim të Komitetit Ndërqeveritar Serbo-Rus për Bashkëpunim Tregtar, Ekonomik, Shkencor dhe Teknik, i cili u mbajt në nëntor, në Shën Petersburg.
Serbia ka pothuajse tri vjet që nuk pranon t’i bashkohet sanksioneve perëndimore kundër Rusisë, edhe pse në Kombet e Bashkuara e kanë dënuar pushtimin e Ukrainës nga Moska.
Bashkimi Evropian, pjesë e të cilit Serbia synon të jetë në të ardhmen, i kërkon Beogradit të vendosë sanksione ndaj Rusisë.
Në deklaratat e tij, Vulini shpesh e kritikon Perëndimin, është vizitor i shpeshtë i Moskës dhe konsiderohet si një nga mbështetësit më të fortë të Kremlinit në mesin e përfaqësuesve të autoriteteve serbe,shkruan gazeta express.Pas takimit të Vulin me presidentin rus, Vladimir Putin, në shtator, Bashkimi Evropian tha se “mbajtja e lidhjeve me Rusinë gjatë luftës së saj agresore kundër Ukrainës nuk është në përputhje me vlerat e BE-së e as procesin e anëtarësimit”.
