Është mbyllur afati i Zyrës së Rregullatorit të Energjisë për dërgimin e komenteve dhe sugjerimeve rreth tarifave të reja të energjisë elektrike. Njohës të fushës thonë se shtrenjtimi i energjisë është i pashmangshëm. Sipas tyre, Kosova është dashur të investojë më shumë në prodhimin e energjisë, në mënyrë që tarifat të mos shtrenjtoheshin.
Dje ka përfunduar afati për dërgimin e komenteve dhe sugjerimeve rreth tarifave të reja të energjisë elektrike. Pas shqyrtimit të tyre, Zyra e Rregullatorit për Energji Elektrike do të vendosë për përqindjen përfundimtare të mundshme të rritjes.
“Raportet që janë përgatitur nga profesionistët në Zyrën e Rregullatorit për Energji janë bazuar në analizën e gjendjes reale të sektorit të energjisë dhe pasqyrojnë nevojat për rritjen e tarifave në përputhje me kushtet ekonomike dhe teknike të tregut të energjisë. Pas përfundimit të procesit të konsultimit publik dhe shqyrtimit të të gjitha komenteve, do të merren vendimet përfundimtare nga Bordi i ZRRE-së, i cili do të përcaktojë masën përfundimtare të mundshme të rritjes”, kanë thënë nga Zyra e Rregullatorit për Energji.
Njohës të fushës thonë se ngritja e tarifave në këtë situatë është e pashmangshme.
“Sipas deklarimeve të ZRRE-së çmimi i energjisë elektrike do të rritet rreth 15%. Unë kam deklaruar me dhjetëra herë se rritja e çmimeve nuk është politikë e drejtë jo vetëm e ZRRE-së, por edhe e institucioneve tjera që ndërhyjnë te energjia elektrike për shkak se ne çdo vit po flasim për rritje të energjisë elektrike e nuk po flasim për rritjen e kapaciteteve prodhuese”, tha për RTK-në Ismet Mulaj, njohës i ekonomisë dhe energjetikës.
E sipas njohësve, Kosova nuk ka pasur politika strategjike për të rritur prodhimin e energjisë, për çka edhe po ngrihen tarifat.
“Kosova vazhdimisht investon në termoelektrana ose në aspekte për rritjen e prodhimit, por vazhdimisht ka ndërprerje të energjisë elektrike. Ka investime por kjo sigurisht se nuk është bërë sa duhet, për arsye se qytetarët e Kosovës flejë mbi ari të zi, siç themi ne”, tha Lulzim Beqiri, njohës i energjetikës.
Mulaj ka theksuar se Qeveria e Kosovës në bashkëpunim me të gjithë, përfshirë ZRRE-në dhe operatorët e energjisë elektrike, iniciativat private, asociacionet ekonomike duhet ta krijojnë një strategji të re, që t’i hapet frymë iniciativës private me qëllim që të ndërtojë kapacitetet e reja.
“Ata që kanë interes të investojnë në kapacitete të reja, pra biznesi privat, duhet që t’u lehtësohet procedura e marrjes së licencës. Mbi 60% e konsumatorëve në Kosovë, sidomos të amvisërive marrin energji elektrike jocilësore, pra jo 230 kw sa është sipas ligjit”, shtoi Mulaj.
Të premten, Bordi i ZRRE-së mbajti mbledhjen e dytë për këtë vit ku edhe u miratua plani 10-vjeçar për zhvillimin e rrjetit të shpërndarjes. Gjatë mbledhjes nuk pati deklarime rreth tarifave të reja të energjisë elektrike.
Ndërkohë, Ministria e Ekonomisë dhe Qeveria e Republikës së Kosovës përmes një deklarate mbrëmë kanë bërë të ditur se kanë analizuar raportet dhe trendet në këtë sektor.
“Komentet dhe sugjerimet tona drejtuar ZRRE-së në konsultim publik përqendrohen kryesisht në dy drejtime: mënyrat se si mund të ulet niveli i propozuar i rritjes; dhe shpërndarja e barrës së rritjes brenda grupeve të konsumatorëve. Në këtë drejtim, konsiderojmë se është e drejtë që rritja të mos prekë amvisëritë që konsumojnë më pak se 800 kWh dhe të shtohet numri i brezeve (blloqeve) të konsumit për konsumin mbi 800 kWh. Këto, duke marrë parasysh analizat tona të trendeve dhe shpërndarjes së konsumit të cilat i përmbledhim shkurtimisht më poshtë”, thuhet në deklaratën e Ministrisë së Ekonomisë.
Ndërkaq, Presidenca e Kosovës ka thënë se kundërshton propozimin për rritjen e çmimit të energjisë elektrike.
“Kostoja e jetesës është bërë shumë më e rëndë për qytetarët, duke bërë që shpenzimet për energji të arrijnë përqindje të larta të të ardhurave, veçanërisht për ata me paga më të ulëta. Përpara se të miratohet rritja e çmimit të energjisë elektrike, ZRRE-ja, duhet të angazhohet në monitorimin e menaxhimit të energjisë nga KEK-u dhe ta rrisë efikasitetin në prodhimin dhe shpërndarjen e energjisë, duke kontribuar në uljen e nevojës për import dhe në menaxhimin më të mirë të burimeve. Rritja e çmimit të energjisë nuk duhet të jetë opcioni i parë dhe i vetëm për të adresuar sfidat financiare, por një zgjidhje më e balancuar dhe e qëndrueshme duhet të jetë në qendër të këtij procesi”, kanë thënë nga Presidenca.
