Aksioni ka përfunduar dhe këta janë shiritat njoftues se kjo veprimtari u mbyll përkohësisht.
Kjo pasi qytetarët tash e shumë kohë kanë kryer shërbimet e sigurimeve por, aty u gjetën parregullsi, gjë bëri të ndërhyjnë inspektorë të BQK-së dhe Inspektorati i Ministrisë së Tregtisë Industrisë dhe Ndërmarësisë.
Policia e Kosovës të mërkurën ka asistuar zyrtarët e Bankës Qendrore të Republikës së Kosovës në një aksion këtu në veri të Mitrovicës afër sheshit “Car Lazar” ku është kryer aksion në këtë kompani të sigurimeve e cila quhet DUNAV.
Sipas Policisë së Kosovës, dyshohet se kjo kompani ka bërë keqpërdorim të autorizimeve ekonomike. Por, aksionet nuk përfunduan me kaq.
Policia mori masa edhe ndaj një institucionit paralel serb në lagjen e Boshnjakeve në të cilën janë kryer shërbime nga ministria e Financave të Serbisë.
Për mbylljen e këtyre dy objekteve paralele, zëvendësdrejtori i Policisë për veriun, Veton Elshani tha se janë konfiskuar dokumente dhe gjëra të tjera që do t’i shërbejnë prokurorisë për hetim.
“Kemi ndërhy aty ka pas punëtorë në vend ku ka qenë tu u punu, i kemi largu punëtorët nga ai vend edhe kemi konfiskua disa materiale të cilat kanë qenë të nevojshme në mënyrë që Prokurori me vendo si me veprua tutje. Është hap rasti falsifikim i dokumentit ndërsa puna aty nuk është ndal vazhdon tutje, kemi konfiskua dokumentacion që aty janë bërë pagesa janë kry shërbime. Po ashtu e kemi pas rastit tjetër te kompania e sigurimeve DUNAV i kemi asistu zyrtarët e BQK-së dhe inspektorët e tregut. Pas mbledhjes se provave është mbyll edhe ai vend”, ka thënë Elshani.
E kryesuesi i Kuvendit Komunal të Mitrovicës së veriut, Nexhat Ugljanin paralajmëroi mbylljen edhe të disa objekteve të tjera që punojnë nën administrimin e Serbisë.
“Ka edhe disa struktura paralele që po funksionojnë, shembull janë Qendra Kulturore, drejtoritë për Sport dhe Rini por sigurisht do të ndërmarrin hapat konkrete për mbylljen totale çdo institucion paralele që po funksionon në pjesën veriore sigurisht do të jetë fuqizimi i funksionalizimit edhe komunave të pjesës veriore”,ka thënë Ugljanin.
Për aksionin e djeshëm të policisë në veri reagoi edhe ministri i Punëve të Brendshme, Xhelal Sveçla i cili tha se do të hetohet gjithçka nga institucionet e Republikës së Kosovës. /teve1
