Parlamenti Europian do të hapë në Tiranë një zyrë e cila do të shërbejë si një pikë kyçe kontakti mes PE-së dhe parlamenteve kombëtare, shoqërisë civile dhe gjithë partnerëve lokalë në gjithë Ballkanin Perëndimor.
Lajmin e bëri të ditur sot kryeministri Edi Rama, përmes një komunikimi live në rrjetet sociale në rubrikën “Sy m’sy”.
Kryeministri theksoi se me hapjen e kësaj zyre në Shqipëri PE konfirmon një strategji më të gjerë të BE-së dhe nga ana tjetër përcakton pa diskutim Shqipërinë si një pikë referimi jashtë perimetrit të BE-së dhe si vendin që së shpejti do të jetë anëtar i BE-së.
“PE të vendos të hapë zyrën e tij në një narkoshtet? Si ka mundësi?”, u shpreh Rama, duke ironizuar akuzat e opozitës.
Kryeministri informoi se PE ka tre zyra aktualisht: një në Nju Jork për marrëdhëniet me Kombet e Bashkuara, një në Xhakarta për marrëdhëniet me Azinë Juglindore dhe një në Addis Ababa për marrëdhëniet me Bashkimin Afrikan.
“Sot Shqipëria dhe Tirana bëhen vendi mikpritës i zyrës së re të PE-së. Një zyrë tjetër PE me gjasë do të hapë edhe në Moldavi për të mbuluar pjesën në kufi me Rusinë”, shtoi Rama.
Kryeministri e cilësoi këtë vendim një vlerësim të jashtëzakonshëm dhe një moment tjetër shumë të mirë për pozicionin ndërkombëtar të Shqipërisë.atsh.
