Presidenti i Serbisë, Aleksandar Vuçiq, në një intervistë për gazetën Politico me seli në Bruksel ka thënë se nuk ka marrëdhënie me kryeministrin e Kosovës Albin Kurti.
Vuçiq për portalin e Brukselit në një artikull për situatën në veri të Kosovës, pretendon se lidershipi i Kosovës është i fiksuar pas tij.
“Nëse lexoni çfarë thonë çdo ditë, është gjithmonë Vuçiq, Vuçiq, Vuçiq”, shtoi ai.
Politico shkruan për konfliktin e gjatë mes Kosovës dhe Serbisë për statusin e enklavave me shumicë serbe në veri të Kosovës.
Kryeministri i Kosovës, Aljbin Kurti, siç shkruan Politico, e akuzoi Vuçiqin për “irracionalitet” dhe “dëshpërim” dhe deklaroi se ai po udhëheq një “fushatë agresive për konflikte të reja”.
Shkëmbimi i fyerjeve, shkruan Politico, pasoi thirrjen e Vuçiqit këtë javë për zgjedhje të reja lokale në veri të Kosovës për të qetësuar tensionet që shpërthyen në vitin 2023, kur komuniteti serb në masë të madhe i bojkotoi ato.
Politico përmend edhe sulmin në Banjskë ku u vra një polic i Kosovës dhe tre terroristë. Gjithashtu përmendet edhe se dhjetëra ushtarë të NATO-s u plagosën gjatë protestave ndërsa përpiqeshin të mbanin të dy palët larg dhe se BE-ja nuk arriti të qetësonte konfliktin.
Këtë javë, shkruan Politico, negociatorët e BE-së u përpoqën të mbajnë një takim trepalësh me të dërguarin special për dialogun ndërmjet Beogradit dhe Prishtinës, Miroslav Lajçak, por të dyja palët nuk pranuan.
Dje, presidentja e Komisionit Evropian, Ursula von der Leyen, mblodhi liderët ballkanikë në një drekë pune në Bruksel për të diskutuar planin e BE-së për rritje dhe integrim në tregun e përbashkët të BE-së, dhe megjithëse Kurti dhe Vuçiq ishin të pranishëm, ata nuk bisedonin me njëri-tjetrin.
“Ne nuk kemi asnjë marrëdhënie”, tha Vuçiq për Politico në prag të udhëtimit të tij në Bruksel.
Kritikët thonë se Vuçiq po luan të dyja palët duke i inkurajuar serbët vendas në Kosovë që të rezistojnë dhe më pas duke u bërë si viktimë kur Prishtina reagon, shkruan Politico.
Portali shton se presidenti i Serbisë ka thënë se nuk ka interes të “ndez zjarrin”, edhe pse qeveria e tij nuk e njeh pavarësinë e Kosovës, të cilën ende e konsideron si pjesë të Serbisë.
Vuçiq pretendon se Kosova është pala që bllokon përparimin në negociata.
“Edhe pse njerëzit në Bruksel shohin se cila anë po bllokon përparimin, ata kurrë nuk do ta thoshin këtë publikisht…BE-ja dhe amerikanët pajtohen me ne”, tha Vuçiq për Politico.G.E.
