Zëdhënësi i Policisë së Kosovës, Agron Borovci, ka thënë se tashmë janë vënë në lëvizje bashkë me Prokurorinë e Shtetit për të zbardhur pretendimet e një qytetari të Podujevës se është sulmuar fizikisht nga Shpejtim Bulliqi.
Borovci ka konfirmuar se rasti është denoncuar rreth orës 9 e 30 të mëngjesit në stacionin policor në Podujevë.
“Rreth orës 09:30 në stacionin policor në Podujevë është denoncuar një rast i sulmit fizik”, ka thënë Borovci.
Ai ka thënë se aktualisht janë duke u trajtuar pretendimet e denoncuesit dhe se bashkë me Prokurorinë po i koordinojnë veprimet.
“Aktualisht janë duke u trajtuar pretendimet e paraqitura nga denoncuesi, dhe me qëllim të zbardhjes së plotë të të gjitha rrethanave që karakterizojnë ngjarjen veprimet policore po ndërmerren në koordinim me prokurorin e shtetit”, ka thënë Borovci për Express.
Qytetari i Podujevës i cili është edhe punonjës i Komunës të cilën e drejton Bulliqi e ka denoncuar këtë të fundit në polici duke thënë se gjatë kohës sa ishte në ambulancë me nënën e tij fillimisht ishte sulmuar verbalisht e më pas edhe fizikisht nga Bulliqi.
Qytetari pretendon se është kapur për fyti nga Bulliqi. Pas këtij denoncimi i njëjti është dërguar për kontroll mjekësor dhe pritet të ndërmerren veprime të mëtejshme.
Express ka provuar që ta kontakojë Shpejtim Bulliqin lidhur me rastin, mirëpo ky i fundit nuk i është përgjigjur thirrjeve të redaksisë.