Kryeministri Edi Rama deklaroi se Shqipëria ka një mundësi reale për anëtarësim në Bashkimin Evropian, duke theksuar progresin e bërë në procesin e negociatave. Gjatë fjalës së tij në Komitetin e Politikës së Jashtme të Internacionales Socialiste, ai u shpreh optimist për të ardhmen evropiane të vendit.
“Jemi gati për të marrë mandatin e katërt. Kemi një mundësi për anëtarësim në BE, yjet janë në drejtimin tonë. Kemi punuar fort që negociatat të ecnin përpara. Ajo që shoh është se mund të hyjmë në Bashkimin Evropian tani. Duhet të bëjmë të pamundurën,” tha Rama.
Duke iu referuar zgjedhjeve të 11 majit, kreu i qeverisë nënvizoi se Partia Socialiste është e përgatitur për një tjetër mandat, duke shprehur besimin në mbështetjen e qytetarëve.
Komiteti i Politikës së Jashtme të Internacionales Socialiste po zhvillon punimet këtë të shtunë në Tiranë, duke sjellë në qendër të diskutimeve çështje të rëndësishme të politikës globale dhe integrimit evropian.
