Ish-anëtari i Shtabit të Përgjithshëm të UÇK-së, Ramë Buja, në një intervistë dhënë emisionin “Direkt” në ATV, ka zbuluar bisedën që kishte shkrimtari i njohur Ismail Kadare me Hashim Thaçin në Paris, para nënshkrimit të marrëveshjes së Rambujesë, transmeton atvlive.tv.
Buja tha se Kadarenë e kishin pranuar në takim përzemërsisht, me të cilin kishin biseduar për rreth një orë në Paris.
Në këtë takim nuk kishte pasur nëonjë kërkesë të veçantë nga Kadare, përveç që i kishte këshilluar që ta nënshkruajnë marrëveshjen.
“Në takimin me Ismail Kadarenë, që e kishte kërkuar ai dhe ne pranuam me shumë kënaqësi, sepse ai ishte sinonim i së mirës krijuese letrare, por Hashimi historinë e njihte mirë, kishte lexuar edhe veprën e tij, me ne ishte edhe Bukurije Gjonbalaj, ai nuk kishte kërkuar asgjë prej neve përveç një bisedë shumë të këndshme, vetëm pati thënë: ‘Do të ishte mirë djema ta nënshkruani këtë marrëveshje që të favorizohet Kosova’. S’ishte çështja as e interferimit në material, asnjë gjë. Kemi pirë kafe, ka qenë edhe Helena, gruaja e tij dhe e kemi kaluar një kohë rreth një orë, mbase pak më shumë. Veç ka kërkuar miqësisht që ta bëjmë atë hapin që kërkohej në atë kohë, që ta bëjmë nënshkrimin e marrëveshjes”, tha Buja.
