Aktakuza ndaj katër drejtuesve të lartë të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit e Rexhep Selimit, pritet të rëndohet me akuza të reja që iu referohen krimeve që pretendohet të jenë kryer në fshatrat Semetishtë e Budakovë të Suharekës dhe në konviktin e Gjilanit.
Këto akuza ish-komandanti i Zonës Operative të Pashtrikut, Sadik Halitjaha, i ka cilësuar si imagjinatë të gjykatës, që sipas tij, janë për t’i shtuar peshën asaj që supozohet që i bën fajtorë udhëheqësit e Ushtrisë Çlirimtare të Kosovës, njofton kk.
“Këto shtesat që bëhen, anekset e shtuar në aktakuzë, aktakuzë e cila akoma nuk është aprovuar nga gjykata, siç nuk është lëshuar nga gjykatësi i procedurës paraprake edhe vendimi për arrestimin e udhëheqësve të Ushtrisë Çlirimtare të Kosovës, janë bërë shumë shkelje, edhe ky aneks është imagjinatë, për t’i shtuar peshën asaj që supozohet që i bën fajtorë Udhëheqësit e Ushtrisë Çlirimtare të Kosovës”, është shprehur Halitjaha.
Halitjaha theksoi se gjatë luftës nuk ka pasur urdhra askush të arrestojë apo të ndalojë dikë.
“Këtu është bërë luftë e vërtetë dhe nuk është e vërtetë se kemi pasur të drejtë të ndalimit të njerëzve, kemi pasur qëndrim mos të futen brenda nesh njerëz të dyshimtë, por jo të arrestohen. Askush nga ushtarët nuk ka pasur pranga apo urdhra të arrestojë dikë”, theksoi ai.
“Nuk kemi pasur burgje, shtëpi me dry, vendqëndrim të njerëzve, kemi qenë ushtri vullnetare herë me një kodër, herë në tjetrën, s’kemi pasur ligje për të dënuar njerëz. S’kemi pasur strukturë, gjykatë”, shtoi ai.
Ai potencoi se gjatë luftimeve kanë zënë tre serbë, por që të njëjtit janë liruar më pas, pa pasur nevojën e ndërmjetësimit.
“Tre i kemi arrestuar, i kemi kapur gjatë betejës, kanë qenë tre serbë, dhe më pas i kemi liruar, veç iu kemi marrë armët, pa pasur nevojë për ndërmjetësim”.
“Lufta e Budakovës është një luftë që ka zgjatur më shumë se një vit, në çdo betejë kanë dalë humbës forcat serbe, humbjet e tyre kanë qenë trefish më shumë, kemi vrarë sa kemi mundur”.