Shefi i Shtabit të Përgjithshëm të Forcave të Armatosura të Serbisë, Milan Mojsiloviq, është takuar të mërkurën në Beograd me Atasheun e Mbrojtjes së Federatës Ruse, Genadi Mozhayev.
Mojsiloviq ka thënë se Forcat e Armatosura serbe janë “të hapura për të gjitha format e bashkëpunimit që synojnë ruajtjen e paqes dhe stabilitetit” dhe shtoi se respektimi i ligjit ndërkombëtar publik dhe marrëveshjeve aktuale është mënyra më e mirë për të parandaluar dhe përfunduar konfliktet në kontinent dhe në mbarë botën.
Shefi i Shtabit të Përgjithshëm të Forcave të Armatosura Serbe, Milan Mojsiloviq, në një takim me Atashen e Mbrojtjes të Federatës Ruse në Beograd, Gjenadi Mozhajev, tha se ushtria serbe ishte e gatshme për çdo formë bashkëpunimi me Rusinë, sipas një deklarate të zyrës së shtypit të Ministrisë së Mbrojtjes Serbe.
“Të dyja palët shkëmbyen pikëpamjet dhe mendimet e tyre në lidhje me sigurinë në rajon dhe në botë në tërësi si dhe për mundësitë [dypalëshe] të bashkëpunimit në sferën e mbrojtjes”, vazhdoi deklarata.
Serbia nuk i ka vendosur sanksione Rusisë për agresionin ushtarak në Ukrainë, pavarësisht se zyrtarisht thotë se është vend kandidat për Bashkim Evropian. Ajo ka injoruar të gjitha vërejtjet e Perëndimit dhe është vendi i vetëm në Evropë bashkë me Bjellorusinë që kanë refuzuar sanksionimin e Rusisë për shkak të lidhjeve të saj tradicionale.
Është gjithashtu i vetmi vend evropian që vazhdon nënshkrimin e marrëveshjeve të bashkëpunimit me Moskën. Serbia në shkurt të këtij viti mori edhe një tjetër dërgesë armësh nga aleati i saj Rusia. Presidenti populist serb Aleksandar Vuçiq atëherë kishte prezantuar një sistem rus anti-drone për bllokimin elektronik të njohur si Repellent, për të cilin së fundi tha se “është në duart tona”. Shumica e grumbullimeve të fundit ushtarake serbe vjen nga Rusia, shkruan Gazeta Express.Materialet e tjera vijnë nga Kina si dhe nga disa prodhues evropianë të armëve dhe avionëve. Shumica e deklaratave të Vuçiqit kërcënuese janë kundër Kosovës. Gjithashtu, ai ndjek një retorikë përçarëse edhe kundër Bosnjë e Hercegovinës, ndërsa presidenti nacionalist i Republikës Srpska, Milorad Dodik, që mbështetet nga Vuçiq dhe Kisha Ortodokse Serbe vazhdimisht tenton të prishë stabilitetin në Bosnjë e Hercegovinë dhe rajon, duke minuar Marrëveshjen e Dejtonit.
