SHBA njoftoi një paketë të re sanksionesh kundër kolonëve izraelitë në Bregun Perëndimor, duke i akuzuar ata për “minim të stabilitetit” të territorit palestinez të pushtuar nga Izraeli.
Kjo është hera e dytë që nga fillimi i vitit që kolonët izraelitë janë vënë në shënjestër të sanksioneve zyrtare të Uashingtonit, gjë që po rrit presionin ndaj aleatit të saj gjatë luftës me Hamasin në Gaza.
Këto sanksione të reja synojnë “të mbajnë përgjegjës ata që përjetësojnë dhunën dhe nxisin trazira në Bregun Perëndimor”, tha në një deklaratë zëdhënësi i Departamentit të Shtetit të SHBA, Matthew Miller.
Miller shtoi se është “thelbësore” që “Izraeli të marrë masa shtesë për t’i dhënë fund dhunës së kolonëve dhe t’i mbajë përgjegjësit”.
Departamenti Amerikan i Thesarit saktëson se këto sanksione synojnë tre individë, Zvi Bar Yosef, Neri Ben Pazi dhe Moshe Sharvit, të cilët sipas zyrtarëve janë shtetas të rinj izraelitë që jetojnë në Bregun Perëndimor. Sanksionet prekin edhe dy komunitetet bujqësore, “Moshes Farm” dhe “Zvis Farm”.
Pasuritë e tyre janë të ngrira dhe atyre u ndalohet të bëjnë biznes me amerikanët, abxnews.al.Kur shpalli valën e parë të sanksioneve në fillim të shkurtit, presidenti amerikan Joseph Biden dënoi dhunën “e padurueshme” të kolonëve izraelitë, e cila, sipas tij, përfaqëson një “kërcënim serioz për paqen, sigurinë dhe stabilitetin” në rajon.
