Kryeministri i Kosovës, Albin Kurti, i shoqëruar nga Ministri i Kulturës, Rinisë dhe Sportit, Hajrulla Çeku, gjatë ditës së sotme vizituan familjen Emra me rastin e ndarjes nga jeta të akademikut, profesorit dhe piktorit, Tahir Emra, i njohur edhe si një prej pionierëve të artit pamor në Kosovë.
Sipas njoftimit për media nga ekzekutivi, në këtë vizitë për ngushëllime, në të cilën u prit nga familjarët e të ndjerit, kryeministri Kurti lartësoi figurën e shquar të piktorit Tahir Emra, si një akademik që do të inspirojë edhe brezat e ardhshëm.
“ Në librin e kujtimeve, kryeministri shkroi se vepra e tij do të rrojë e frymëzojë brezat pas nesh e artistë edhe jashtë nesh”, thuhet në njoftim.
Tutje theksohet se kryeministri Kurti i shprehu ngushëllimet e tij më të sinqerta familjarëve të akademikut, miqve të tij si dhe komunitetit kulturor.
“Piktor akademik, profesor i dashur, artist patriot, njeri i vendit e popullit tonë, vepra e të cilit do të rrojë e frymëzojë brezat pas nesh e artistë edhe jashtë nesh. Tahir Emrën e mbajmë fort në kujtesë të gjithë. Me mall dhe pikëllim, me nderime dhe admirim.”, shkroi kryeministri Kurti në librin e kujtimeve.
