Përfaqësuesit e shqiptarëve në Luginën e Preshevës kanë paralajmëruar formimin e një Asociacioni për ta. Kjo ide, ka ndezur flakë Beogradin, i cili kërcënon përdorim të forcës
Përfaqësuesit e shqiptarëve në Luginën e Preshevës kanë paralajmëruar për të shtunën, themelimin e një Asociacioni për komunat shqiptare në serbi, i ngjashëm me Asociacionin e Komunave me shumicë serbe në Kosovë. Mirëpo ky vendim ka ndezur flakë lidershipin në Beograd, i cili kanë kërcënuar shqiptarët me përdorim të forcës.
Kryetari i Komunës së Preshevës, Ragmi Mustafa ka thënë se Asociacionin do ta themelojnë për t’i realizuar të drejtat e shqiptarëve në Luginën e Preshevës ashtu siç po krijohet ai në Kosovë për t’i realizuar të drejtat e serbëve në territorin e Kosovës.
Mustafa theksoi se kjo iniciativë vjen duke u nisur prej parimeve, principeve dhe standardeve të njëjta të pakicave kudo që ndodhen në regjion jashtë shtetit të tyre amë.
“Duke qenë se Lugina menaxhohet nën juridiksionin dhe është përbrenda territorit të Serbisë, këshilltarët shqiptar të Medvegjës, Bujanocit dhe Preshevës kanë kërkuar me shkrim organizimin e një seancë të përbashkët në Preshevë për të shtunën, 12 shtator, me qëllim sjelljen e një vendimi për themelimin e Asociacionit të Komunave me shumicë shqiptare në Luginën e Preshevës”, tha ai për KP.
Kjo, sipas tij, është e vetmja pikë e rendit të ditës e cila do të shqyrtohet dhe miratohet në këtë seancë të përbashkët të këshilltarëve shqiptarë të tri komunave.
“Do të pasohen edhe me veprimet e tjera duke përpiluar statutin e saj, rregulloret e punës dhe duke themeluar më vonë edhe organet sipas statutit, por do të shfrytëzohen përsëri format dhe modelet e statutit të komunave serbe në Kosovë”, deklaroi mes tjerash prefekti i Preshevës.
Mirëpo ende pa u konterziuar si ide, asociacioni i shqiptarëve, kanë plasur reagimet nga lidershipi në Serbi.
Kryetari i Partisë Socialiste të Serbisë dhe ministri Punëve të Jashtme të Serbisë, Ivica Daçiq i ka kërcënuar shqiptarët e Luginës së Preshevës që mos ta “themelojnë Asociacionin paralele të komunave siç është rasti me Asociacionin e komunave me shumicë serbe në Kosovë”.
Daçiq në mitingun parazgjedhor të mbajtur në Medvegjë, ku të dielën mbahen zgjedhjet e jashtëzakonshme lokale, ka thënë se shqiptarët se në këtë komunë dhe në komunat Bujanovc dhe Preshevë nuk duhet të jenë të diskriminuar, por duhet ta respektojnë Kushtetutën dhe rendin e vendit ku jetojnë.
“I paralajmëroj ata që të shtunën në Preshevë mos të themelojnë ndonjë Bashkësi paralele me atë që është në Kosovë. I paralajmëroj ata që mos të luajnë me zjarrin dhe ta respektojnë rendin Kushtetutës të Republikës së Serbisë. Ajo që Serbia është për dialog, nuk do të thotë se është e dobësuar, përkundrazi, ajo është e fuqishme, më fuqishme në 20-30 vitet e fundit”, ka thënë Daçiq.
Ndërsa kryetari i Komisionit Parlamentar të Serbisë për Kosovën, Milovan Drecun ka thënë se janë të papranueshme paralajmërimet për formimin e Bashkësisë së Komunave Shqiptare në Serbi dhe se nuk mund të bëhet një paralele më Asociacionin e Komunave Serbe
Ai ka deklaruar për RTS-së se politikanët nga jugu i shtetit janë vetëm pengje të interesave të Prishtinës dukë shtuar se paralajmërimi për themelimin e asociacionit të komunave shqiptare po bëhet në ujdi me Tiranën. Sipas Drecun, paralajmërimet për themelimin e Asociacionit të Komunave Shqiptare ka të bëjë me zgjedhjet në Medvegjë që janë planifikuar të mbahen të dielën.
Ndërsa kryeministri i Serbisë Aleksandar Vuçiqi gjatë një interviste, mbrëmë në Televizionin Publik të Serbisë, tha se “duhet të reagojmë me mençuri dhe urtësi, por nëse do të duhet, atëherë do ta tregojë forcën, dhe Serbia do të dijë mjaft mirë ta tregojë”.
Ai ka përmendur se një nga komunat e theksuara për këtë asociacion është Medvegja, ku popullsia serbe është shumicë dhe që në të ka gjithsej 6 për qind shqiptarë.
Në anën tjetër Ish-politikani Azem Vllasi ka vlerësuar se Serbia nuk ka mundësi ta parandalojë krijimin e Asociacionit të Komunave Shqiptare në Luginë të Preshevës.
“Kjo është ide e mirë dhe mund të realizohet lehtë, pasi komunat e Preshevës, Bujanocit dhe Medvegjës kanë shumë të përbashkëta, jo vetëm në aspektin etnik, por edhe në aspekte tjera. Ky asociacion do të jetë i dobishëm për ta dhe Serbia, edhe pse ndoshta nuk e pëlqen, nuk ka mundësi që ta pengojë krijimin e saj, pasi këtë e lejojnë konventat evropiane për organizim regjional”, ka thënë Vllasi.
Nëse Asociacioni i Komunave me shumicë serbe në Kosovë është i mirë, atëherë sipas Vllasit, pse ai të mos jetë model edhe për shqiptarët e Luginës së Preshevës.
