Kryeministri Edi Rama është takuar të martën me komandantin e komandës Evropiane të SHBA njëherazi dhe Komandanti Suprem i Aleatëve për Evropë, gjeneralin Christopher Cavoli.
Lajmi është bërë i ditur nga një postim i Ambasadës Amerikane në platformën “X”. Në postim thuhet se ky takim ka theksuar lidhjet e forta të mbrojtjes midis Shteteve të Bashkuara dhe Shqipërisë duke përfshirë rolin vendimtar të Shqipërisë në NATO.
Gjithashtu theksohet se përpjekjet e përbashkëta ushtarake janë jetike për rajonin.
“Komandanti i Komandës Evropiane të Shteteve të Bashkuara (EUCOM) dhe Komandanti Suprem i Aleatëve për Evropë (SACEUR), gjenerali Christopher Cavoli u takua dje me kryeministrin Edi Rama. Takimi theksoi lidhjet e forta të mbrojtjes midis Shteteve të Bashkuara dhe Shqipërisë, duke përfshirë rolin vendimtar të Shqipërisë në NATO dhe përpjekjet e përbashkëta ushtarake, të cilat janë jetike për promovimin e paqes në rajon dhe më gjerë”,-thuhet në postimin e Ambasadës Amerikane.
