Presidenti i SHBA-së, Donald Trump kërcënoi grupin e vendeve të BRICS-it, të ekonomive në zhvillim, me tarifa prej 100% nëse largohen nga dollari amerikan si një mjet ndërkombëtar pagese.
“Ideja që vendet e BRICS-it po përpiqen të largohen nga dollari, ndërsa ne qëndrojmë pranë dhe shikojmë, ka përfunduar”, tha Trump në platformën e tij të mediave sociale Truth Social.
“Ne do të kërkojmë një angazhim nga këto vende, në dukje armiqësore, që ata as nuk do të krijojnë një monedhë të re BRICS, as nuk do të mbështesin ndonjë monedhë tjetër për të zëvendësuar dollarin e fuqishëm amerikan ose ata do të përballen me tarifa 100%”, vazhdoi Trump.
Akronimi BRICS rrjedh nga shkronjat fillestare të vendeve anëtare themeluese Brazili, Rusia, India, Kina dhe Afrika e Jugut.
Në fillim të vitit 2024 Irani, Etiopia, Egjipti dhe Emiratet e Bashkuara Arabe iu bashkuan BRICS, ndërsa Indonezia u bashkua në fillim të janarit.
Grupi synon të veprojë si një kundërpeshë ndaj G7-ës.
Presidenti rus Vladimir Putin ka kritikuar vazhdimisht dominimin e monedhës amerikane dhe ka shpallur synimin e tij për të krijuar një sistem të pavarur pagesash dhe kleringu brenda aleancës.
Monedha amerikane është deri tani më e rëndësishmja në transaksionet globale të pagesave.
Duke futur një monedhë tjetër joperëndimore, Moska shpreson të ndikohet më pak nga sanksionet e vendosura ndaj Rusisë nga Perëndimi për luftën e saj në Ukrainë.
Tarifat janë një shtesë mbi mallrat e importuara.
Ato paguhen me hyrjen e mallrave në vend.
Trump vendosi një sërë tarifash për mallrat e importuara gjatë mandatit të tij të parë në detyrë nga 2017 deri në 2021, shkruan atsh.Ekonomistët supozojnë se tarifat me ndikim të gjerë do të çojnë në një rritje të çmimeve në SHBA
