Kryetari i LDK-së, Lumir Abdixhiku, uron Qeverinë dhe popullin e Shteteve të Bashkuara të Amerikës, për Ditën e Pavarësisë, gjegjësisht 248 vjetorin e shpalljes së pavarësisë, përcjell Kosova Post.
Ndërsa shpreh urimet më të mira, Abdixhiku thekson se 4 korriku i vitit 1776 shënon datën e lindjes së një vendi që identifikon luftën për lirinë e të gjithë popujve, për demokracinë dhe prosperitetin në botë
“4 korriku i vitit 1776, shpallja e pavarësisë së ShBA-ve padyshim shënon datën e lindjes së një vendi që identifikon luftën për lirinë e të gjithë popujve, për demokracinë dhe prosperitetin nëpër botë. Në historinë politike të krijimit të shteteve, SHBA-të janë themelues dhe pishtar i të drejtës universale për të jetuar të lirë secili popull kudo në botë.”
Për më tepër kryetari i LDK-së thotë se SHBA-të janë sinonim i kombit të madh që angazhohet përherë për një botë më paqësore dhe më të sigurt.
“Sot, Shtetet e Bashkuara të Amerikës janë sinonim i kombit të madh, që angazhohet përherë për një botë më paqësore dhe më të sigurt. Ato janë motiv dhe model i shumë popujve anekënd globit për liri, paqe e demokraci”, tha Abdixhiku.
I pari i LDK-së flet edhe për rolin e SHB-së në Kosovë, duke theksuar se SHBA-të kanë qenë, janë dhe do të mbesin aleat i përhershëm strategjik.
Siç shprehet ai pa mbështetjen e SHBA-ve Kosova do ta kishte të pamundur lirinë, krijimin dhe konsolidimin e shtetit.
“Edhe për Kosovën SHBA-të kanë qenë, janë dhe do mbesin aleat i përhershëm strategjik, pa mbështetjen e të cilëve vendi ynë do ta kishte të pamundur lirinë, krijimin dhe konsolidimin e shtetit. Aleanca me ShBA-të është e përmbledhur qartë në postulatin e atit themeltar të Republikës, Presidentit Historik Rugova: “Kosova shtet i pavarur e sovran, i integruar në NATO e BE, dhe me miqësi të përhershme me Shtetet e Bashkuara të Amerikës”. Vizioni politik i yni është i qartë; duhet ta ndjekim orientimin natyral politik drejt vlerave perëndimore e integrimin në strukturat euro-atlantike” tha Abdixhiku.
Tutje në emër të LDK-së ai shpreh urimet më të përzemërta për SHBA-të e popullin e saj.
“Në emër të Lidhjes Demokratike të Kosovës, uroj Qeverinë dhe popullin e Shteteve të Bashkuara të Amerikës për Ditën e Pavarësisë. Urime Ditën e Pavarësisë SHBA! Zoti i bekoftë Shtetet e Bashkuara të Amerikës! Zoti e bekoftë miqësinë në mes dy vendeve tona!”
