Kryeministri i Serbisë, Millosh Vuçeviq, tha sot se nuk do të ketë përparim në dialogun ndërmjet Beogradit dhe Prishtinës për sa kohë të jetë kryeministri i Kosovës Albin Kurti , ndërsa shtoi se për këtë është në dijeni edhe i dërguari special i BE-së për dialogun, Miroslav Lajçak, transmeton Kosova Post.
Vuçeviq në një paraqitje të ftuar në televizionin Blic tha se është i shqetësuar se Perëndimi po i dorëzohet kryeministrit të Kosovës.
“Nuk shoh asnjë milimetër hapësirë që diçka të lëvizë në dialog derisa të jetë Kurti në pushtet. Kur fola me Miroslav Lajçakun në Athinë para dhjetë ditësh, shoh se edhe ata janë të vetëdijshëm për këtë. Ata janë të vetëdijshëm se Kurti me siguri nuk do ta formojë Asociacionin e Komunave Serbe. Mua më duket joreale që Quinti nuk ka asnjë ndikim te Kurti. Ata thonë se po bëjnë presion, por ne nuk shohim ndonjë përparim,” tha Vuçeviq.
Ai duke komentuar deklaratën e ministrit kosovar Xhelala Sveçla se presidenti i Serbisë Aleksandar Vuçiq do të arrestohet nëse vjen në Kosovë, ka thënë se “banditët nuk mund ta arrestojnë kurrë presidentin e një shteti”.
