Çfarë befasie për Mackenzie Kinsella: tifozi i Evertonit e ka marrë rrugën nga Australia për në Angli për ta parë derbin “Merseyside” mes ekipit të tij të zemrës dhe Liverpoolit.
Kjo ndeshje, e paraparë të luhej në “Goodison Park” të shtunën e 7 dhjetorit, u shty për shkak të motit të ligë dhe stuhisë Darragh, i cili i goditi Mbretërinë e Bashkuar dhe Irlandën.
15 vjeçari i bëri 17 mijë kilometra për ta realizuar një ëndërr të madhe, por parashikimi i motit e detyroi Federatën Angleze që ta anulonte lojën vetëm pak orë para se ajo të fillonte, e vetmja e shtyrë në atë fundjavë në Premierligë.
Për të realizuar ëndrrën dhe për ta shikuar ‘live’ lojën, siç njoftojnë tabloidet britanike, ai i shpenzoi 1.800 euro për udhëtim, biletë të sfidës kundër Wolverhamptonit, të cilën Evertoni i tij e fitoi 4:0 më 4 dhjetor, dhe biletën e ndeshjes kundër Liverpoolit, lider në Premierligë dhe në Ligën e Kampionëve.
Klubi i kaltër, sapo e kuptoi sakrificën e tij, natyrisht se mendoi për të.
Tifozi i ri e mori një vide-mesazh nga Seamus Coleman, kapiten i Evertonit.., përcjell “Gazeta Express”.“Tung Mackenzie, jam Seamus Coleman. Po ta dërgoj këtë video-mesazh për të të thënë se e di që je mjaft i dëshpëruar. E di se sa kohë dhe para ke harxhuar për të udhëtuar nga Australia për ta parë derbin e ‘Merseyside’. Dhe, e di edhe se mezi prisje ta shijojë këtë eksperiencë në ‘Goodison Park’. Jemi të dëshpëruar edhe ne, mezi prisnim të zbrisnim në fushë për të luajtur. Por, do të na pëlqente të të shohim këtu në fushën e stërvitjeve të hënën (9 dhjetor), nëse je dakord. Shpresoj që do të mundë t’i shohësh disa prej djelmoshave dhe që kjo të mund ta kompensojë sadopak dëshpërimin tënd, kështu që edhe do të mundë të bisedojmë. T’i uroj krejt të mirat, Mackenzie, do të kujdesem për ty.”
