Kryetari i Partisë Demokratike të Kosovës, Memli Krasniqi ka uruar mësimdhënësit me rastin e 7 Marsit – Ditës së Mësuesit.
Ai ka thënë se kjo është një nga ditët më të rëndësishme të kalendarit tonë – që na kujton themelin e çdo suksesi si shoqëri.
“Mësimdhënësit tanë nuk kanë qenë vetëm edukatorë, por edhe patriotë, udhërrëfyes dhe burim frymëzimi për familje dhe breza të tërë: ashtu siç ishte Shaban Jashari”, tha Krasniqi.
Për më tepër Krasniqi theksoi se “mësimdhënësit kanë qenë shtylla mbi të cilën është mbështetur qëndrueshmëria jonë kombëtare, duke u bërë pishtarë të dijes edhe në kohët më të vështira”.
“Në momentet më të errëta për vendin, kur shkolla nuk ishte thjesht një institucion, por një bastion i rezistencës dhe shpresës, ata sakrifikuan gjithçka për një të ardhme më të mirë. Sot, ndërsa vazhdojnë të edukojnë brezat e rinj, ata mbeten zemra e shoqërisë dhe garancia për një Kosovë më të zhvilluar”, ka shkruar Krasniqi në Facebook.
