Lutjet e para të xhumasë për muajin e agjërimit mysliman të Ramazanit u zhvilluan pa incidente në Jeruzalem, pavarësisht shqetësimeve për dhunë duke pasur parasysh armëpushimin e brishtë midis Izraelit dhe milicisë palestineze Hamas.
Rreth 80 000 besimtarë morën pjesë në lutjet në një vend kyç fetar në Qytetin e Vjetër të Jeruzalemit, i njohur për myslimanët, si “Shenjtërorja Fisnike” dhe për hebrenjtë si “Mali i Tempullit”, sipas vlerësimeve nga autoriteti Waqf, autoriteti mysliman përgjegjës për administrimin e vendit.
Izraeli është përgjegjës për sigurinë dhe ka dislokuar një numër të madh oficerësh gjatë Ramazanit, kur shpesh raportohen incidente të dhunshme.
Vendi, me Kupolën e Shkëmbit dhe Xhaminë al-Aksa, konsiderohet i treti më i shenjtë në Islam dhe është gjithashtu i shenjtë për hebrenjtë pasi, dy tempuj hebrenj ndodheshin atje.
Izraeli rriti masat e sigurisë para lutjeve të para të xhumasë dhe kufizoi numrin e besimtarëve që lejoheshin të vinin nga Bregu Perëndimor i pushtuar në 10 000, siç ka bërë në vitet e mëparshme.
Kufizimet e moshës zbatoheshin edhe për besimtarët në Bregun Perëndimor: vetëm burrat e moshës 55 vjeç e lart, gratë e moshës 50 vjeç e lart dhe fëmijët nën 12 vjeç lejohen të hyjnë në vend – me një leje udhëtimi të vlefshme.
Nuk ka kufizime për arabë-izraelitë, por agjencia palestineze e lajmeve WAFA raportoi se disa të rinjve ende u mohohej hyrja në vend.
Në vitet e mëparshme, deri në 200 000 njerëz u dyndën në vend për lutjet e së premtes, shumë prej tyre nga Bregu Perëndimor./atsh
