Një aferë e publikuar në media në vitin 2014 kishte vënë në pah se si zyrtarë të lartë të EULEX-it dyshohet se merrnin ryshfet për të mbyllur raste kriminale.
Pasi u publikuan një mori shkrimesh filloi edhe persekutimi ndaj ish-prokurores së EULEX-it që po hetonte “peshqit e mëdhenj”, Maria Bamieh.
Maria Bamieh, e cila tash së fundmi e fitoi një proces gjyqësor dhe arriti një marrëveshje me Britaninë e Madhe për t’i marrë rreth gjysmë milioni euro, kishte siguruar prova se dy prej zyrtarëve me të lartë të EULEX-it kanë marrë ryshfet për të mbyllur të paktën tri raste të mëdha kriminale.
Një ndër rastet më të mëdha të krimit të organizuar në të cilën janë të përfshirë shumë pjesëtarë të Policisë së Kosovës është ai i shpërthimit në lokalin Sekiraça dhe vrasja e trefishtë e familjes Baftiu.
Gazetari Vehbi Kajtazi kishte siguruar dokumente të ndryshme, përfshirë disa shkresa të Bamieh drejtuar eprorëve të saj dhe autoriteteve të Bashkimit Evropian në Bruksel. Në këto shkresa dhe komunikime të ndryshme komunikime flitet për raste të ndryshme hetimore, ndërhyrje nga jashtë, marrje ryshfeti, kërcënime të prokurorëve dhe mos-mbrojtje të tyre nga ana e EULEX-it.
Sipas dosjes së publikuar nga gazetari Kajtazi, njëri prej të arrestuarve dhe të akuzuarve të paktën dy herë ka qenë Nysret Cena. Por, ai gjithmonë kishte dalë pastër. Dyshimet hidhen se ky rezultat është arritur për shkak të ryshfetit të dhënë prej 300 mijë eurosh.
Gjithë shuma që kishte kërkuar për t’i shpallur të pafajshëm edhe të akuzuarit tjerë, Besnik Hasanin dhe Shpend Qërimin dyshohet se kishte qenë 750 mijë euro. Ata nuk i kanë paguar këtë shumë dhe janë dënuar në dy rastet, në njërin me nga 30 vjet burgim e në tjetrin me nga 25 vjet.
Në gjykimin e policëve të rajonit të Ferizajt për shpërthimin në lokalin Sekiraça është përmendur hetimi kundër Françesko Florit. Hetimi konfirmohej nga një vendim i Gjykatës së lartë të Tiranës që ka marrë përsipër verifikimin. Nga ky vendim shihej se i dyshuar është edhe avokati Mahmut Halimi. Halimi nuk përmendej në dosjen e Bamieh por vetëm në vendimin e Gjykatës së Tiranës.
Atë kohë ai mbronte Besnik Hasanin. Kishte mohuar të gjitha dyshimet. Kishte thënë se akuzat mund t’i jenë bërë nga Florim Hasani për shkak se i kanë mbetur borxh mbi 30 mijë euro.
Bazuar në vendimin e Gjykatës së Tiranës, negociatat e ryshfetit besohej se janë bërë në qytetin e Durrësit në verën e vitit 2009. Por, Hasani dhe Qërimi nuk kishin arritur të japin shumën e nevojshme. Këtë besohej se e ka bërë vetëm Cena i cili ishte shpallur i pafajshëm në dy procese, ndërsa dy të tjerët ishin dënuar po në ato dy procese gjyqësore.
Kur Cena ishte shpallur i pafajshëm në rastin e shpërthimit nga trupi gjykues i kryesuar nga Francesko Florit, ishte thënë se përgjimet telefonike kanë treguar se ai nuk ndodhej me të akuzuarit tjerë.
Besnik Hasani, ish-pjesëtar i Njësisë speciale të Kosovës, dhe Shpend Qerimi, ish-pjesëtar i Njësisë Antidrogë, janë dënuar për shkak se më 24 shtator 2007, në lagjen “Dardania” në Prishtinë, kishin vënë eksploziv në lokalin e Enver Sekiraqës që kishte shkaktuar vdekjen e dy personave dhe ishin plagosur 12 të tjerë. Shpërthimi ishte kryer në shenjë hakmarrjeje për vrasjen e policit Triumf Riza.
Ata janë dënuar për vrasjen e trefishtë që ishte kryer më ndërmjet 27-28 shtatorit 2007, në vendin e quajtur te “Ura e Lepencit” afër fshatit Soponicë të Ferizajt. Por këtë vrasje sipas një dëshmitari e kishte kryer Nysret Cena. Ky dëshmitar i ka thënë prokurorit Reshat Millaku se nuk guxon të dëshmojë për shkak se mund ta vrasin.
Gjykimi për vrasjen e trefishtë vazhdon edhe sot. Tash lënda është në duart e drejtësisë vendore.
Prokuroria Speciale tash akuzon ish-oficerin policor Shpend Qerimi, Besnik Hasanin dhe Agron e Afet Dalloshin për rastin e vrasjes së trefishtë.
Në një gjykim të mëhershëm, Qerimi, së bashku me Besnik Hasanin, ishin shpallur fajtor dhe dënuar me 33 vjet burgim. Gjykata e Apelit e kishte kthyer rastin në rigjykim. Lënda, momentalisht ndodhet në shkallën e parë të gjykatës në Prishtinë.
Aktakuza e re e Prokurorisë Speciale të Kosovës ngarkon këta për vrasje, dy vrasje në tentativë dhe armëmbajtje pa leje.
Nusret Cena, 48-vjeç, një ish-ushtar i Ushtrisë Çlirimtare të Kosovës, dyshohet se është ekzekutuar për vdekje në një atentat në Kaçanik të hënën në mbrëmje.
Hetuesit e Policisë së Kosovës kanë zbuluar se Cena është ekzekutuar me breshëri plumbash nga një distancë e afërt derisa po voziste me veturë në magjistralen Ferizaj-Kaçanik, në vendin e njohur si Kaçaniku i Vjetër.
“Nga hetimet e para, ekzaminimit të vendit të ngjarjes dyshohet se personi/persona të panjohur në Kaçanik të Vjetër nga afërsia kanë shti breshëri plumbash mbi automjetin dhe shoferin e më pas janë larguar nga vendi i ngjarjes në drejtim të panjohur”, tha Policia e Kosovës në një komunikatë për media të martën.
Jo larg vendit të ngjarjes, në fshatin Soponicë të Kaçanikut, policia ka njoftuar se është gjetur edhe një automjet tjetër i udhëtarëve i përfshirë nga flaka.
“Ekziston dyshimi se personat e dyshuar pasi e kanë kryer vrasjen në Kaçanik të Vjetër i kanë vënë flakën automjetit dhe janë larguar”, tha policia.
Nusret Cena ishte një ushtar i Ushtrisë Çlirimtare të Kosovës, Brigada 162 “Agim Ramadani” në Zonën Operative të Nerodimës.